María Fjóla Harðardóttir:
Ég myndi vilja fá að velja mína búsetu sjálf, hvort sem ég er í mínu eigin húsnæði eða öðru. Það yrði að vera húsnæði sem ég kemst vel um sjálf, með eða án hjálpartækja, eða þar sem ég er örugg og gæti fengið þjónustu. Að öðrum kosti vildi ég geta valið mér það hjúkrunarheimili sem ég vildi búa á og á þeim stað sem ég vildi eiga heima.

Þorbjörn Guðmundsson:
Ég er ekki tilbúinn að fara inn á stofnun, án þess að ég vilji gera lítið úr því. Ég vil búa í umhverfi sem er allra líkast því sem ég er í nú. Það er svolítið skrítin tilfinning á hverjum morgni þegar ég sest og fæ mér morgunkaffið, að þá eru allir að fara í vinnuna. Ég sit einn eftir. Það er dálítið erfitt.

Það sem er mikilvægast að gerist núna eftir kosningar er að það verði sett ráðuneyti sem sér um þennan málaflokk. Það eru núna tvö eða þrjú ráðuneyti sem fara með málefni eldra fólks. Það er algjörlega útilokað kerfi. Þetta ætti að vera forgangsatriði núna, að þegar ný ríkisstjórn sest að völdum, þá fái þessi málaflokkur mjög skýra stöðu í stjórnkerfinu.

Dagur B. Eggertsson:
Minn óskastaður yrði Reykjavík og ég vona að ég verði ekki úr hófi leiðinlegur og að Arna vilji búa með mér ennþá. Þetta eru lykilþættirnir. Ég hugsa að ég þurfi lyftuhús og ég vona að það verði stutt í alla þjónustu, stutt á barinn, og stutt í samneyti við annað fólk, það er það sem gefur lífinu gildi í dag og alla daga, og það mun án efa ekki minnka þegar árin færast yfir.

Dagur B. Eggertsson

Borgrárráð samþykkti nýlega tillögu Dags B. Eggertssonar borgarsjóra um að taka upp  Menningar- og heilsukort eldri borgara í Reykjavík frá og með komandi hausti. Kortið á að nýtast öllum Reykvíkingum sem hafa náð 67 ára aldri til að fá endurgjaldslausan aðgang að sundlaugum og menningarstofnunum sem reknar eru af borginni. Þessir afslættir hafa þegar verið innleiddir í fjárhagsáætlun ársins, en töluverð brögð eru að því að eldri borgarar þekki ekki til þessara fríðinda eða nýti sér þau ekki til heilsubótar og menningarauka. Í greinargerð sem lögð var fram með tillögunni segir að tillaga um „frístundakort eldri borgara“ hafi verið ein af tillögunum sem starfshópur um heilsueflingu aldraðra vann undir forystu Ellerts B. Schram, núverandi formanns Félags eldri borgara (FEB) í Reykjavík og nágrenni. Með nýju Menningar- og heilsukorti Reykjavíkurborgar er tekið undir áðurnefnda tillögu. Þegar kortið verður orðið að veruleika má tengja það frekari fríðindum líkamsræktarstöðva eða fyrirtækja sem veita eldri borgurum afslætti og verði það útfært og innleitt í samráði við FEB.