Eldra fólk hafði áhrif í fyrra

Á fundinum í Háskólabíói munu fulltrúar allra flokka sem bjóða fram á landsvísu, koma og greina frá því hvað þeir hyggjast gera í málefnum eldra fólks komist þeir til áhrifa. Fyrir rúmu ári, fyrir síðustu alþingiskosningar, var haldinn svipaður fundur á sama stað, en þá var mörgum eldri borgurum mikið niðri fyrir og þeir fylltu húsið.  Viðar segir að margir telji að þá hafi verið knúin fram meiri hækkun á grunnlífeyri almannatrygginga en ella hefði orðið, enda hefði eldra fólk látið vel í sér heyra á fundinum.  Viðar segir að með því að koma á  fundinn á laugardaginn en vera ekki þöglir heima, nöldrandi hver í sínu horni, geti eldri borgarar haft árif.  Það hafi sýnt sig fyrir síðustu kosningar.

Mikilvægt að eldra fólk skili sér á kjörstað

Fólk 67 ára og eldra telur um 41.000 manns og þetta er sá hópur sem er þekktastur fyrir að skila sér á kjörstað. „Það er mikilvægt að þessi hópur láti engan bilbug á sér finna, þrátt fyrir kosningaþreytuna sem maður verður var við í þjóðfélaginu“, segir Viðar. „Þessi hópur verður að láta í sér heyra, mæta á fundinn og hann verður að kjósa. Ef kosningaþáttaka verður dræm, geta atkvæði þessa hóps vegið þyngra ef hann skilar sér á kjörstað. Það er því mjög mikilvægt að eldra fólk geri upp hug sinn, ákveði hvaða stjórnmálaflokki það treystir best fyrir kjörum sínum og kjósi samkvæmt því“, segir Viðar. „Það er eina leiðin til að koma af stað breytingum að láta vita af sér. Við værum enn í vistarböndum ef við hefðum trúað því að við gætum engu breytt“.

Vinna sér inn 100 þúsund en fá 32 þúsund í vasann

Félag eldri borgara í Reykjavík telur að margt í frumvarpinu horfi til bóta, en annað sé óviðunandi. Þá sé ljóst að verulegur hluti þessara rúmlega 5 milljarða fari tilbaka til ríkisins í formi tekju- og veltuskatta.  Með frumvarpinu stendur til að afnema aftur frítekjumark þeirra sem eru í vinnu, en þeir hafa getað unnið sér inn rúmar 100 þúsund krónur á mánuði, án þess að það skerði eftirlaunin sem þeir fá frá Tryggingastofnun ríkisins. Félagið telur að þetta vinni beinlínis gegn því markmiði frumvarpsins að fá eldra fólk til að vinna lengur.  Enda, hver ætti að vilja vinna eftir að eftirlaunaaldri er náð, ef þeir enda uppi með 32 þúsund krónur í vasann vinni þeir sér inn 100 þúsund krónur?  Þá gerir frumvarpið að hluta til ráð fyrir tilfærslu fjár, þ.e. frá millitekjuhópnum til þeirra sem hafa lágar tekjur, þannig að eftirlaun 4500 manns lækka verði frumvarpið samþykkt óbreytt.  Þeir tekjulægstu virðast heldur ekki fá nógu mikið í sinn hlut, verði frumvarpið að veruleika.

Vill 300.000 króna lágmarks eftirlaun

Krafa Félags eldri borgara og Gráa hersins er sem fyrr, að lágmarkslaun eldra fólks, fylgi almennum lágmarkslaunum í landinu og verði 300.000 krónur árið 2018. Þá vill félagið allar skerðingar burt. Undir þessar kröfur taka flestir, ef ekki allir flokkar sem eru í stjórnarandstöðu.  Félagið og Grái herinn efna til borgarafundar í Háskólabíói annað kvöld, miðvikudaginn 28.september klukkan 19:30 og ætla að krefja frambjóðendur allra flokka svara um hvernig þeir hyggjast ná þessum markmiðum.  Fundarmönnum verður gefinn kostur á að koma með spurningar úr sal.