Hvers vegna dreymir svo marga skólann? Jú, menntavegurinn hvort sem hann er langur, stuttur, auðfarinn eða torsóttur er einfaldlega stór hluti af ævi okkar. Við verjum okkar viðkvæmustu árum í skóla, þar myndum við flest okkar fyrstu og stundum dýpstu vináttubönd og þar mótumst við félagslega. Flestir læra þar að takast á við og yfirstíga erfiðleika hvort sem þeir tengjast námsefninu eða samskiptum. Þess vegna er ákaflega eðlilegt að hugurinn leiti reglulega aftur til námsáranna hvort sem við erum vakandi eða sofandi.

Í skóla upplifa margir kvíða í fyrsta sinn. Óttinn við að standa sig ekki falla á prófi fylgir stórum hópi fólks gegnum alla skólagönguna. Tæplega sextug kona segir: „Mig dreymir enn reglulega að ég sé kölluð til baka í gamla menntaskólann minn og mér sagt að eitthvað sé athugavert við eitt prófið sem ég tók og þar með sé öll mín menntun eftir það ógild. Mismunandi er hvernig þetta endar og oft óljóst. Ég man að stundum mótmæli ég og rífst við kennara eða rektor, ég hef líka heimtað að fá að sjá prófið og einu sinni endaði draumurinn á að ég var rekin út úr skólanum og stóð fyrir utan full af skömm og vanlíðan.“ Hún er ekki ein um að dreyma þennan draum. Hann er mjög algengur og ásækir fólk helst þegar það er undir álagi í vinnu eða hefur hugsað sér að breyta um kúrs í starfi.

Próf eru ákaflega táknræn

Karlmaður um sjötugt segir að sig dreymi reglulega að hann sé aftur kominn í skóla og eigi að fara að taka próf en viti að hann hafi enga kunnáttu. Hann er ekki einn um það því stór hópur Bandaríkjamanna sagði í nýlegri rannsókn að þeirra helsta martröð væri að dreyma að þeir hefðu fallið á prófi. Prófkvíðinn situr því í fólki langt fram eftir ævi.

Sérfræðingar segja að þetta sé eðlilegt því að í skóla upplifi börn í fyrsta sinn að þau þurfi að standa sig utan heimilisins. Fram að því er veröld þeirra bundin við fjölskylduna og í flestum tilfellum er mistökum þar vel tekið og auðvelt að leiðrétta þau. Í skólanum er hins vegar iðulega aðeins ein tilraun leyfð og nemendur vita að það þarf að læra undir próf til að standast þau. Það hefur áhrif á sjálfsmynd okkar og við tengjum próf við mat á eigin hæfileikum, teljum að þau sanni eða afsanni hæfni okkar og getu. Þess vegna eru þau ákaflega táknræn og leita inn í drauma okkar á margvíslega vegu.

Marga dreymir einnig oft að þeir séu aftur staddir inni í kennslustofu gamla skólans síns. Lexían sé að byrja eða í fullum gangi. Slíkir draumar koma oft á tímamótum í lífinu og gætu verið vísbendingar um að menn séu að vinna úr upplýsingum eða þeim atburðum sem eru í gangi í veruleikanum. Þeir gætu einnig verið að leita leiðsagnar og halda í vonina um að kennarinn hafi eitthvað fram að færa hvað það varðar. Aðra dreymir að þeir reiki eftir skólagöngunum í leit að kennslustofunni sinni en finni hana ekki. Hver hurðin á fætur annarri mætir þeim og þeir ýmist opna og sjá að þarna eiga þeir ekki að vera eða vita að þetta er ekki þeirra stofa. Sá draumir tengist að sögn sérfræðinga leit fólks að samastað í tilverunni, að viðkomandi sé ekki sáttur við hvar hann er og sé að leita að tilgangi eða þeirri tilfinningu að hann sé einmitt þar sem hann á að vera.

Draumar eru ofnir úr þráðum hversdagsins

Vísindamenn sem hafa sérhæft sig í draumum segja að þeir séu alltaf ofnir úr þráðum hversdagsins. Við verðum fyrir margvíslegum áhrifum yfir daginn og förum með þau inn í svefninn. Allt sem er að gerast í lífi þínu endurspeglast á einhvern hátt í því hvernig þig dreymir og hvað.

Suma dreymir fólk fremur en staði og gamli kennarinn, kærastan frá því gaggó eða strákurinn sem þú varst skotin í en vildi þig ekki dúkka upp. Stundum ertu skólaballi þegar það gerist, á gangi skólans eða á leið heim úr skólanum. Svo er allur gangur á hvernig samskiptin þróast. Kennarinn gæti skammað þig eða hrósað. Í sumum tilfellum er kærastan fráhverf þér eða enn ástfangnari en áður. Strákurinn gæti allt í einu sýnt þér áhuga eða verið þér andstyggilega vondur. Draumar af þessu tagi tengjast alltaf tilfinningalegu uppgjöri. Það kann að vera að núverandi sambönd manneskjunnar séu að rakna eða styrkjast og það birtist á sinn hátt í draumum næturinnar. Hver og einn verður að túlka sína drauma og ef menn telja að þar sé skilboð að finna er sjálfsagt að skrifa niður draumana og velta fyrir sér þeim táknum sem þar birtast.

Þeir eru til sem telja að draumar séu aldrei tilviljanakennt rugl. Þeir séu sprottnir úr undirdjúpum sálarlífsins og því beri ávallt að taka mark á þeim. Allt sem þig dreymir standi fyrir eitthvað, tákni eitthvað í þínum huga og þú þurfir að gera þína eigin draumráðningabók þar sem þau tákn eru ráðin. Þá má grípa til hennar í hvert sinn sem draumar taka að sækja á þig og skoða hvort verið sé að leiða þig áfram að niðurstöðu í erfiðum málum eða sýna hvernig þú getur tekist betur á við stress og álag í daglega lífinu. Kannski er líka verið að beina þér í rétta átt í samskiptum við einhvern af þínum nánustu. Ef draumar þínir eru erfiðir eða jafnvel martraðir mæla sérfræðingar með að tala um drauminn eða skrifa hann niður og breyta endinum þannig að hann sé hagfelldur þér. Það lagar í mörgum tilfellum tilfinningaleg áhrif draumsins og gerir hann þægilegri í huga þér.

Steingerður Steinarsdóttir ritstjóri Lifðu núna skrifar.

Í Bardolino má sjá rústir virkisveggjar frá tólftu öld en það var Della Scala-ættin sem byggði um sig virki til að verja ríkidæmi sitt. Ættin réð Verónaborg um langa hríð og við Garda var sumardvalarstaður þeirra. Þegar inn í bæinn er komið vekur athygli hvernig hann virðist byggður eftir síldarbeinamynstri svipuðu því sem við notum gjarnan til að skapa falleg viðargólf á heimilum. Flest fiskimannaþorp við vatnið byggðust upp á þennan hátt til þess að auðveldara væri að draga bátana á land og verja þá þegar á þurfti að halda.

Það er hægt að una sér lengi við að skoða freskurnar í San Severo

Í Bardolino er að finna fallegar kirkjur þar á meðal San Zeno frá um áttundu öld og San Severo frá þeirri tólftu. San Severo þykir meðal meistaraverka rómansk arkitektúrs og innandyra er að finna undurfagrar freskur sem heilla ferðamenn. Veggirnir og loftið eru bókstaflega þakin myndum af atvikum úr lífi Krists og sögum úr Biblíunni. Þarna er hægt að dvelja langdvölum og una sér við að lesa úr þessum fornum myndasögum. San Severo stendur rétt við norðurhliðið.

Vín, olía og matur

Allt svæðið hér er þekkt fyrir vín- og ólífuolíuframleiðslu. Rauðvínið frá Bardolino er ljósrauðara en flest ítölsk vín og léttara. Margir tala um að það minni á rósavín. Það er mjög eftirsótt meðal vínáhugamanna vegna þess hve léttan og sérstakan keim það hefur.

Í gamla bænum er að finna ótal notalega bari, frábæra veitingastaði og litlar handverksbúðir þar sem hægt er að smakka á og kaupa helstu framleiðsluvörur svæðisins. Það er líka dásamlegt að reika um þröngar götur og ganga meðfram vatninu og drekka í sig andrúmsloft þessa forna og fallega bæjar. Þetta er rólegur bær nema þegar markaðurinn er einu sinni í viku þá fyllast göturnar og margbrotið mannlíf verður alls ráðandi. Fimmtudagar eru markaðsdagar í Bardolino. Þangað streyma þá  bændur og handverksfólk og bjóða vörur sínar til sölu úr litríkum sölubásum. Það er stórskemmtilegt að ganga á milli, smakka, skoða, snerta og spjalla við sölufólkið. Nefna má einnig að Bardolino er örstutt frá skemmtigörðunum Gardaland og Caneva vatnsleikjagarðinum en þar geta flestir skemmt sér konunglega.

Steingerður Steinarsdóttir ritstjóri Lifðu núna skrifar.

Bandaríski rithöfundurinn Kurt Vonnegut sagði frá því í viðtali að í sorginni eftir andlát sonar síns hafi honum verið ráðlagt að byrja að stunda hugleiðslu. Hann leitaði til sérfræðings og bað um leiðbeiningar um hvernig ætti að hefja þá ástundun. En fyrst spurði hann hvað hugleiðslan myndi gera fyrir hann. Hann fékk svarið að í djúpri hugleiðslu hyrfi fólk litla stund frá eigin áhyggjum og sorgum inn í heim slökunar og vellíðunar. „Ég áttaði mig á að hann var að lýsa því sem ég upplifði í hvert sinn sem ég les bók,“ sagði Kurt þá. En hvort sem þú ert meðvituð/aður um heilunarmátt bóka eða ekki ættir þú að leggja leið þín í Borgarbókasafnið í Gerðubergi í næstu viku. Af hverju jú, von er á spennandi gesti, breska rithöfundinum og bókameðferðarfræðingnum Bijal Shah, sem ætlar að deila með okkur þekkingu sinni á bókameðferð og áhrifum lesturs og bókmennta á geðrækt og vellíðan.

Bókameðferð ryður sér til rúms á Íslandi

Breski bókameðferðarfræðingurinn og rithöfundurinn Bijal Shah kemur til Íslands í október á vegum Borgarbókasafnsins og Bókmenntaskólans og heldur vinnustofur og opinn fyrirlestur um bókameðferð og áhrif lesturs og bókmennta á geðrækt og vellíðan. Heimsóknin er liður í að efla þekkingu á bókameðferð og möguleikum hennar hér á landi.

Bókameðferð (e. bibliotherapy) byggir á þeirri hugmynd að bækur og lestur geti hjálpað fólki að skilja eigin reynslu, nefna tilfinningar og vinna úr þeim, auk þess að sjá aðstæður sínar í nýju ljósi. Aðferðin á sér langa sögu og er í dag nýtt á fjölbreyttan hátt á sviðum geðheilbrigðis, menntunar og vellíðunar.

„Í sinni einföldustu mynd er bókameðferð markviss notkun bókmennta til að styðja við bata, sjálfsskilning og persónulegan þroska. Hún nýtir til dæmis skáldverk, fræðibækur, endurminningar, ljóð, goðsögur, ritgerðir eða önnur frásagnarform,“ segir breski bókameðferðarfræðingurinn og rithöfundurinn Bijal Shah, sem ætlar í október að halda vinnustofur á Íslandi og opinn fyrirlestur um bókameðferð og áhrif lesturs og bókmennta á geðrækt og vellíðan.

Bijal Shah er brautryðjandi á sviði bókameðferðar og höfundur bókarinnar Bibliotherapy: The Healing Power of Reading. Hún er einnig stofnandi Book Therapy, vettvangs sem helgaður er tilfinningalegum og sálrænum áhrifum bókmennta. Hún vinnur með einstaklingum, skólum og stofnunum m.a. á sviði heilbrigðisþjónustu. Skrif hennar og bókmenntaráðleggingar hafa meðal annars birst í The Guardian, BBC Culture, Marie Claire og Good Housekeeping.

Á vinnustofunni Bókameðferð, bókmenntir og geðheilbrigði kynnir Bijal Shah bæði fræðilegan grunn og hagnýtar aðferðir við að nýta bókmenntir til ígrundunar, samtals og tengslamyndunar. Hægt er að velja um tvær dagsetningar, annars vegar mánudaginn 26. og hins vegar þriðjudaginn 27. október, kl. 9-16. Farið er yfir sama efni báða dagana. Vinnustofan er haldin í Borgarbókasafninu Gerðubergi. Fjöldi þátttakenda er takmarkaður í vinnustofuna og því er nauðsynlegt að skrá sig í gegnum heimasíðu Borgarbókasafnsins. Vinnustofan fer fram á ensku og er ókeypis.

„Markmiðið er ekki að gera bókasafnsfræðinga eða kennara að meðferðaraðilum,“ segir Bijal, „heldur hjálpa þeim að nýta bókmenntir á meðvitaðri og markvissari hátt í þeim hlutverkum sem þeir gegna þegar.“

Miðvikudaginn 28. október kl. 17–18 heldur Bijal svo opinn fyrirlestur í Borgarbókasafninu Grófinni, Tryggvagötu 15, undir yfirskriftinni Lækningamáttur bóka – kynning á bókameðferð. Þar fjallar hún um sögu bókameðferðar og hvernig lestur getur stutt við geðrækt, samkennd, ígrundun og seiglu í daglegu lífi.

Í framhaldi af komu Bijal til landsins verða sérfræðingar Bókmenntaskólans, Esther Ágústsdóttir, bókmenntafræðingur og kennari og Elín Bergsdóttir, náms- og starfsráðgjafi, félagsfræðingur og ljóðskáld með mánaðarlegar vinnustofur á Borgarbókasafninu Grófinni þar sem unnið verður út frá aðferðum bókameðferðar.

Allir viðburðirnir eru ókeypis.

Nýlega kom út ævisaga Gunnars Inga Gunnarssonar heimilislæknis, Helvítis fantur ertu, en hann starfaði lengst af við heilsugæsluna í Árbæ. Í bókinni sem Guðjón Ingi Eiríksson skrásetur segir Gunnar Ingi frá lífshlaupi sínu, viðburðaríkum ferli sem læknis, hvað hafi mótað hann, sorgum og sigrum. Ferill hans sem læknis er fyrirferðarmikill í bókinni enda snerist hann mikið um að bæði móta heilsugæslu í landinu auk þess sem hann var lengi í stjórn og kjaranefnd Félags íslenskra heimilislækna og tók þar þátt í að bæta kjör og starfsaðstöðu kollega sinna en baráttan var oft hörð.

Viltu ekki bara klára leikinn, vinur

Alvöru vinátta

Flesta ávexti aðra þarf að afhýða og skera niður en ekki berin. Þau er nóg að skola og henda svo yfir hafragrautinn, út í jógúrtina, súrmjólkina, ab-mjólkina eða chia-grautinn. Nú svo má setja slatta í skál og borða eins og snakk yfir sjónvarpinu. Þau eru líka frábær í eftirrétti, kökur, salöt og sultur. Möguleikarnir eru óendanlegir og ber ættu að vera hluti af daglegum kosti flestra. Nú skulum við líta á hvað berin gefa okkur helst:

Sólber – mjög rík af C-vítamíni.

Hindber – eru trefjarík.

Bláber – sérlega góð fyrir heilann og hjartað.

Jarðarber – góð uppspretta mangans og fólats.

Kirsuber – B-vítamín og litarefni sem draga úr bólgum í líkamanum.

Brómber – K- og A-vítamín.

Hversu mikið má borða af berjum yfir daginn?

Mælt er með um það bil 80 g af berjum á dag eða um það bil lúkufylli. Ef fólk er að borða þurrkuð ber t.d. trönber er um það bil 30 g nóg til að fá vel upp í dagskammtinn af trefjum og vítamínum. Ef fólk notar ber út í smoothie má miða við það sama.

5 leiðir til að bæta berjum í daglegan kost

Setja frosin eða fersk ber út á hafragrautinn

Hræra litlum berjum saman við hreina jógúrt eða skyr.

Skella berjum og möndlumjólk í blandarann í eftirmiðdaginn. Fyrirtaks hressing.

Setja jarðarber eða vínber út í salatið með kvöldmatnum.

Eiga alltaf frosin ber í frystinum og nota þau í alls konar eftirrétti.

Í berjum er litarefni, antósýanín eða jurtablámi, en þetta efni hefur þann eiginleika að draga úr bólgum í líkamanum og vísindamenn hafa einnig fundið tengsl milli heilbrigðis hjarta- og æðakerfis og þessa litarefnis. Það hjálpar svo til við að halda blóðflæði til heilans óhindruðu. Það hjálpar fólki einnig að halda niðri blóðþrýstingi og jafnvægi í blóðsykri. Auk þess eru ber mjög trefjarík og flestir á Íslandi þurfa að borða meira af trefjum. Þær viðhalda heilbrigði þarmanna og þarmaflórunnar sem aftur er einstaklega mikilvæg fyrir ónæmiskerfið og nýlegar rannsóknir benda einnig til að fjölbreytt og heilbrigð þarmaflóra létti lundina og vinni gegn þunglyndi. Nú þegar við erum á leið inn í skammdegið er það verðugt umhugsunarefni.

Það þarf sennilega ekki lengur vitnanna við það mælir allt með því að borða meira af berjum. Ber eru fáanleg hér allt árið bæði fersk og frosin en engin afsökun fyrir að nýta sér ekki þá góðu kosti sem þau hafa.

Áhrifamikil saga um flókin fjölskyldumynstur

Eva Björg Ægisdóttir er án nokkurs vafa einn okkar allra besti glæpasagnahöfundur. Hún vex með hverri bók og Þau sem urðu eftir er sérlega eftirtektarverð. Eva Björg kafar hér ofan í sambönd mæðra við börn sín og veltir fyrir sér hvort kærleikurinn geti orðið of þrúgandi, of mikill og viðleitnin til að vernda börnin skaðað þau fremur en skýlt þeim.

Rakel er grunnskólakennari og á leið í vinnuna þegar hún sér í dyrabjöllumyndavélinni í símanum sínum að samstarfskona manns hennar stendur fyrir utan heimili þeirra. Skömmu áður hafði hún komið að þeim tveimur að spjalla saman á samkomu á vegum vinnunnar og sambandið milli þeirra virst nánara en eðlilegt getur talist þegar eingöngu er um vinnufélaga að ræða. Þetta verður til þess að hugur Rakelar hvarflar frá akstrinum og hún lendir í alvarlegum árekstri.

Hún vaknar upp á sjúkrahúsi búin að missa annan fótinn og maðurinn hennar tilkynnir henni að hann vilji skilnað. Áfallið er mikið og um tíma veit Rakel ekki hvaða stefnu hún vill taka í lífinu en svo kviknar hugmyndin að því að gera þætti um óleyst sakamál. Þegar kona vindur sér að henni á veitingahúsi og biður hana að gera þætti um vinkonu sína er hvarf fyrir þrjátíu árum ætlar Rakel sér í fyrstu að láta kyrrt liggja, enda málið íslenskt og viðkvæmt, eins og allt er gerist í litlum samfélögum en samúð hennar með konunni verður til þess að hún byrjar að skoða málið og fyrr en varir hefur hlaðvarp hennar þotið upp eftir vinsældalistum. Ekki nóg með það samfélagsmiðlar loga og ekki virðast allir hafa sagt satt og rétt frá því sem gerðist þetta kvöld.

Að þessu sinni fjallar Eva Björg um flókin fjölskyldumynstur og hvernig þau geta leitt fólk á alvarlegar villigötur. Bækur Evu Bjargar er ævinlega drifnar áfram af samskiptum milli fólks og hvernig ást, aðdáun og væntumþykja geta snúist upp í andhverfu sína eða leitt til þess að annars gott fólk geri slæmi hluti. Eva Björg ter frábær höfundur og tekst ævinlega að skapa áhugaverðar og spennandi fléttur. Þessi er svo grípandi að það er engin leið að leggja hana frá sér fyrr en henni er lokið.

Leyndarmál grafið upp úr moldinni

Þegar gömul bein finnast fyrir tilviljun hefja Tófa eða Torfhildur og Alfreð lögreglumenn á Suðurlandi að rannsaka málið. Þau komast fljótt að því að líkamsleifarnar eru af Finnboga, ungum efnilegum námsmanni sem hvarf fyrir 35 árum skömmu áður en hann átti að halda út Bandaríkjanna í nám. Þessi óvænti beinafundur gefur von um að leyndardómurinn um hvað kom fyrir Finnboga verði loksins leystur.

Hann hafði verið í partíi ásamt öðrum ungmennum í heimabæ sínum kvöldið sem hann hvarf og slegist við einn strákanna þar Hrafn að nafni, en sá var ofbeldishneigður og kom frá brotnu.  Bar Hrafn á ábyrgð á dauða Finnboga? Fyrrverandi kærasta hans, Snæfríður, vill sem minnst tjá sig við lögregluna og hún er uppburðarlítil og virðist ófær um að standa með sjálfri sér en Tófu grunar að hún viti meira um hvarfið en hún fæst til að tala um.

Tófa nýlega flutt aftur heim á æskuheimili sitt. Pabbi hennar er kominn á dvalarheimili fyrir aldraða í bænum en mamma hennar dáin. Hún er ófrísk en ein á báti og á erfitt með að koma sér að verki við að taka upp úr kössum, laga heimilið að sínum smekk og þörfum og undirbúa almennilega komu barnsins.

Hér eru mannleg samskipti og tengsl í forgrunni eins og í bókum Evu Bjargar. Erfiðar aðstæður draga fram mismunandi eiginleika í skapgerð fólks og unglingar flækjast oft inn í atburðarás sem þau ráða ekki við. Það er ekki einfalt mál að finna út hvað gerðist í partíi fyrir 35 og hver eftirleikurinn var eftir að Finnbogi gengur þaðan út. En Tófa og Alfreð er ákveðin í að komast að sannleikanum og færa Kristbjörg móður hans frið í sálina.

Þuríður Ósk Sigurbjörnsdóttir er ný rödd í kór glæpasagnahöfunda og svo sannarlega ekki hjáróma. Moldin man er ansi vel uppbyggð og skemmtilega fléttuð saga. Þuríður Ósk skapar trúverðugar  og skemmtilegar persónur og sagan er bæði áhugaverð og spennandi.

Steingerður Steinarsdóttir ritstjóri Lifðu núna skrifar.

Borgin og blómin nefnist ný sýning listakonunnar Unu Erlínar sem hefur verið opnið á Borgarbókasafninu Grófinni. Á sýningunni má sjá verk sem byggja á ljósmyndum af mannvirkjum og gróðri í Reykjavík, teknar á tímabilinu 25. maí til 25. ágúst.

Myndirnar eru framkallaðar með svokallaðri cyanotype aðferð, þar sem að ljósnæmt efni gerir myndinina sýnilega með geislum sólarinnar. Myndefni af mannvirkjum og gróðri er skeytt saman og þannig myndast súrrealísk draumaveröld þar sem að hið manngerða og hið náttúrulega blandast saman, en með verkunum veltir listakonan upp þeirri spurningu hvort hægt sé að upplifa fegurð náttúrunnar innan borgarmarkanna.

Una Erlín er nýútskrifuð úr BA námi í grafískri hönnun við Listaháskóla Íslands. Hún hefur mikin áhuga á náttúru og útivist og eyðir miklum tíma á grænum svæðum borgarinnar.

Sýningin er opin á afgreiðslutíma bókasafnsins og stendur yfir til 24. október.

Aðgangur er ókeypis og öll eru hjartanlega velkomin!

Um sýninguna:

https://borgarbokasafn.is/borgin-og-blomin

Skagenfylling:

• 2 harðsoðin egg, smátt söxuð
• 170 g af smátt söxuðum humarhölum
• 100 g af rjómaosti með dillbragði
• 1 msk. af rauðum hrognum eða kavíar
• 1 dl af sýrðum rjóma (crème fraîche)
• ½ dl af majónesi

Aðferð:

Hrærið saman rjómaostinum, sýrða rjómanum og majónesinu og blandið síðan humrinum og kavíarnum saman við. Smyrjið á rúllutertubrauðið og rúllið því upp. Berið síðan majónesi utan á tertuna og skreytið hana með því sem ykkur þykir best t.d. humarhölum og agúrkusneiðum, sítrónum, rækjum, hvítlauksostbitum eða hverju því sem ykkur dettur í hug að passi vel með fyllingunni.

Annar möguleiki: Lifrarkæfufylling

• 200 g af lifrarkæfu
• 1½ msk. af sýrðum rjóma (crème fraîche)
• ½ dl af sýrðri agúrku (sætsúrri, saxaðri gúrku)

Smyrjið rúllutertubrauðið með lifrakæfu, raðið ofan á sýrðu gúrkunni og rúllið upp. Berið sýrða rjómann utan á það og skreytið

Grunnblanda af sósu fyrir brauðtertur:

• ½ dl af léttþeyttum rjóma
• 1 dl af sýrðum rjóma (crème fraîche)
• ½ dl af majónesi

Aðrar hugmyndir að fyllingum og skreytingum:

• Rækjur
• Reyktur lax
• Skinka
• Egg
• Dill
• Gúrka
• Tómatar
• Vínber
• Ferskjur
• Apríkósur
• Aspas
• Graslaukur
• Vorlaukur

Jónína Leósdóttir er margreyndur höfundur og hefur skrifað á þriðja tug bóka – þar á meðal vinsælu glæpasagnaseríunar um Eddu. Það er stutt í hið spaugilega í verkum Jónínu og það á einnig við um glæpasögurnar hennar. Í bókakaffinu mun Jónína segja frá nýjustu bók sinni Algjör Perla sem kom út fyrr á árinu.

Benný Sif Ísleifsdóttir hefur skrifað fyrir bæði börn og fullorðna og hlotið lof lesenda jafnt sem gagnrýnenda fyrir verk sín. Skáldsögur Bennýjar eru örlagasögur fólks úr íslenskum veruleika og er nýjasta bókin engin undantekning. Vetrarþrestir er söguleg skáldsaga sem gerist árið 1969 og fjallar um fólk á krossgötum sem leggur allt í sölurnar í von um að tengjast og tilheyra öðrum.

Um viðburðinn:

https://borgarbokasafn.is/events/4a38ec22-09cb-4ec7-bd35-07ae7634a0a1,20261019

Sagan gerist á þremur tímaskeiðum. Við kynnumst ungum dreng í Reykjavík á árunum 1980-1994.  Hann er lagður í einelti af skólafélögum sínum og elst upp við sérstakar aðstæður því foreldrar hans eru bæði blind og hann ekki hræddur við myrkrið. Þess á milli fáum við sögu  Odd Strange, á árunum 2007-2010. Hann á eiginkonu og barn og þau þurfa að takast á við efnahagshrunið á Íslandi. Odd er hálfnorskur og Inger, kona hans norsk, svo þau ákveða að byrja nýtt líf í Noregi. Þar kemur Inger að illa leiknu líki ungrar sómalskrar konur og þau hjónin fara að rannsaka dauða hennar því norska rannsóknarlögreglan virðist á algjörum villigötum. Að lokum hittum við Odd í óhrjálegu hjólhýsi á Spáni. Hann er illa farinn líkamlega og vinnur fyrir sér sem einkaspæjari. Helst virðist hann fá verkefni við að leita uppi horfin gæludýr en þá leitar til hans ung kona og biður hann að finna vinkonu sína sem ekki hefur skilað sér heim úr vinnu daginn áður. Odd felst á það og þá hefst atburðarás þar sem hann þarf á öllum sínum kröftum og þekkingu úr fortíðinni að halda.

Jón Atli er brjáðsnjall sakamálahöfundur og kann vel að byggja upp áhugaverðar persónur sem heilla lesendur. Honum er líka einkar lagið að búa til trúverðuga atburðarás og flétta spennandi söguþráð. Dauðinn er bara myrkur er ný fjöður í hattinn fyrir hann því hún er bæði frumleg og skemmtileg.

Steingerður Steinarsdóttir ritstjóri Lifðu núna skrifar.