Lambapottréttur með karrí og sætum kartöflum

Þessi réttur yljar svo sannarlega. Flestum finnst hann góður og það er ekki flókið að útbúa hann. Uppskriftin er fengin af vefnum Eldhússögur en þar er að finna margar góðar uppskriftir. Það sem til þarf er þetta.

  • 1 meðalstór laukur, saxaður smátt
  • 1 msk ólífuolía + msk smjör
  • ca. 50 g massaman curry paste
  • 700 g lambagúllas
  • 500 g sætar kartöflur, skornar í bita
  • 400 g blómkál, skorið í bita
  • 250 ml kjúklingasoð
  • 1 dós Hunts tómatar í dós með hvítlauk
  • salt og pipar
  • ferskt kóríander (hægt að nota flatblaða steinselju í staðinn)

Olía og smjör hituð og laukurinn steiktur þar til hann verður mjúkur. Þá er lambagúllasi bætt út í pottinn og steikt þar til kjötið hefur náð góðum lit. Því næst er karrí-maukinu bætt út í og steikt með kjötinu í 1-2 mínútur. Gott er að smakka sig áfram með maukið því það getur verið missterkt eftir framleiðendum. Þá er tómötum og kjúklingakrafti bætt út í, kryddað eftir þörfum. Suðan látin koma upp. Látið malla undir loki í um það bil 20 mínútur, hrært í pottinum öðru hvoru. Þá er sætum kartöflum og blómkáli bætt út í og látið malla í um það bil 15 mínútur til viðbótar eða þar til sætu kartöflurnar og blómkálið er soðið í gegn. Fersku kóríander dreift yfir eða borið fram með réttinum ásamt hrísgrjónum, sýrðum rjóma eða grískri jógúrt og naan brauði.

Ritstjórn janúar 25, 2019 11:18