Hádegistónleikar Íslensku óperunnar

Á hádegistónleikum þriðjudaginn 2. júní koma fram mezzósópransöngkonan Ingveldur Ýr Jónsdóttir og Antonía Hevesi á píanó. Flutt verður leikhústónlist og kabarettlög úr smiðju þýska söngleikjameistarans Kurt Weill.

Tónleikarnir fara fram í Norðurljósum í Hörpu og er aðgangur ókeypis.

 

Ingveldur Ýr Jónsdóttir syngur jafnt óperutónlist sem söngleikja-, kabarett- og dægurlagatónlist. Raddsvið hennar spannar bæði sópran- og mezzosópran í óperum. Hún hefur komið fram víða um heim bæði á óperusviði og á tónleikapallinum. Ingveldur Ýr var um skeið fastráðin við Óperuna í Lyon í Frakklandi og söng þar stór og smá hlutverk með stjórnendum á borð við Kent Nagano og Sir Neville Marriner. Við Bastilluóperuna söng hún nornina í Hans og Grétu og hefur sungið á alþjóðlegum tónlistarhátíðum m.a. á Tanglewood-hátíðinni í Bandaríkjunum í Peter Grimes undir handleiðslu Maestro Seiji Ozawa.

Á íslensku óperusviði söng Ingveldur Ýr stór hlutverk í uppfærslum á Évgení Ónegin, Niflungahringnum, Á valdi örlaganna, Così fan tutte, Dido og Eneas, Sweeney Todd og Rake´s Progress. Hún hefur margsinnis komið fram með Sinfóníuhljómsveit Íslands, m.a. í Guðrúnarkviðu eftir Jón Leifs, 9. sinfóníu Beethovens, Carmen, á Vínartónleikum og í D-dúr messu Dvoráks. Ingveldur Ýr hefur hlotið viðurkenningar og styrki, auk starfslauna listamanna, m.a. til að sinna þessu verkefni. Hún nam söng og leiklist við Tónlistarskóla Vínarborgar og lauk mastersgráðu frá Manhattan School of Music í New York. Hún hefur lokið 2. stigi í raddfræðum hjá Estill Voice Training.

Antonía Hevesi er fædd í Ungverjalandi og útskrifaðist úr F. Liszt- tónlistarakademíunni í Búdapest með M.A.-gráðu í kórstjórn og sem framhaldsskólakennari í söng og hljómfræði. Einnig stundaði hún orgelnám við Hochschule für Musik und darstellende Kunst í Graz hjá Otto Bruckner. Antonía hefur haldið fjölda tónleika sem orgelleikari og píanómeðleikari víðsvegar um Evrópu og í Kanada. Hún hefur tekið þátt í meistaranámskeiðum í píanóundirleik og spilað inn á geisladiska. Í rúman áratug hefur Antonía verið listrænn stjórnandi og píanóleikari hádegistónleikaraðar Hafnarborgar, og hefur hún ennfremur komið fram á flestum hádegistónleikum Íslensku óperunnar síðastliðin ár. Á undanförnum árum hefur hún tekið þátt í uppfærslum á hátt í þrjátíu óperum, með Norðurópi, Óp-hópnum og hjá Íslensku óperunni, þar sem hún er fastráðin píanóleikari.

Ritstjórn maí 11, 2015 10:48