Komdu í ferð um ljóð og líf Davíðs Stefánssonar

Komdu í Hannesarholt fimmtudaginn 21.janúar klukkan 20 til að slást í för með Valgerði H. Bjarnadóttur í ferð um ljóð og líf Davíðs Stefánssonar skálds, í tilefni af 100 ára skáldaafmæli hans.

Davíð Stefánsson

Davíð Stefánsson

 

21. janúar 1916 var Davíð Stefánsson staddur í Kaupmannahöfn og hélt upp á 21 árs afmæli sitt með félaga sínum og afmælisbróður, Birni O. Björnssyni. Þeir voru báðir félagar í Boðn, bræðralagi ungskálda. Davíð hafði örfáum dögum áður fengið inngöngu í félagið eftir að hafa flutt þeim nokkur af ljóðum sínum.     Boðnarbræðrum var boðið í afmælið auk fleiri vina, og Björn, sem vildi koma þessum bróður á framfæri, hafði einnig boðið þangað Sigurði Nordal. Sigurður var 10 árum eldri en þeir félagar og var kominn til nokkurra metorða í bókmenntaheiminum.  Í veislunni las Davíð ljóðabálkinn Skammarrímur, en einnig lítið ljóð um

ástir og þjáningu, ort í orðastað konu. Hann kallaði ljóðið Komdu. Sigurður heillaðist.  Erindið sem snerti hann dýpst var þetta:

„Ekki skal það kvelja þig
skóhljóðið mitt,
ég skal ganga berfætt
um blessað húsið þitt.“

Valgerður H. Bjarnadóttir

Valgerður H. Bjarnadóttir

Bókmenntafræðingurinn stóð upp að lestri loknum og las upp dómsorðið: „Þessi maður er skáld!“  Í kjölfarið birtust sjö af ljóðum Davíðs í tímaritunum Eimreiðinni og Ísafold, fyrir milligöngu Sigurðar, og þau slógu í gegn. Davíð Stefánsson var orðinn skáld.

Veitingastofurnar opna kl. 18.30 fyrir þá gesti sem vilja snæða léttan kvöldverð í formi menningarplatta áður en dagskrá hefst. Menningarplatta þarf að panta fyrirfram með borðapöntun í síðasta lagi kl. 16.00 daginn fyrir.

Ritstjórn janúar 19, 2016 13:48