Óperukynning – Peter Grimes

Benjamin Britten var eitt mesta óperutónskáld 20. aldar og flutningur á óperu hans, Peter Grimes, er stórviðburður í íslensku tónlistarlífi. Á óperukynningu í Kaldalóni 19. maí kl. 20 leiðir Árni Heimir Ingólfsson tónlistarfræðingur gesti um tónheim óperunnar í máli og myndum.

Tilefnið er flutningur Sinfóníuhljómsveitar Íslands og Íslensku óperunnar á Peter Grimes, 22. maí, í Hörpu á Listahátíð í Reykjavík.

Það eru Vinafélag Sinfóníuhljómsveitar Íslands og Vinaféleg Íslensku óperunnar sem standa að kynningunni.  Kynningin fer fram í Kaldalónssal Hörpu. Aðgangur er ókeypis og öllum heimill.  

Britten var afkastamikið óperuskáld, samdi sautján slíkar á árunum 1941–73. Hann hafði eðlislægan skilning á mannsröddinni og var eitt fárra tónskálda á síðari hluta 20. aldar sem lögðu varanlegan skerf til óperunnar með verkum sem nú eru færð upp um allan heim.

Peter Grimes (1945) var fyrsta stóra ópera Brittens og henni var þegar í stað tekið sem meiriháttar framlagi til greinarinnar. Hér kannaði hann viðfangsefni sem áttu eftir að fylgja honum alla tíð – stöðu einstaklingsins í þjóðfélaginu og mörk sakleysis og sektar. Óperan gerist í litlu sjávarþorpi á Bretlandi þar sem skipstjórinn Peter Grimes er búsettur. Þegar gáleysi hans verður því valdandi að aðstoðarmenn hans týna lífi hver á eftir öðrum taka bæjarbúar að ofsækja hann. Að lokum grípur hann til þess óyndisúrræðis að sigla á haf út og sökkva þar skipi sínu. Tónlistin er á köflum magnþrungin og dramatísk, en inn á milli bregður fyrir ljórænu og glettni.

 
Ritstjórn maí 11, 2015 10:46