Smekkleysa 30 ára

Nú stendur yfir  sýning  í Þjóðarbókhlöðu í tilefni af 30 ára afmæli Smekkleysu sem er reyndar að verða 31 árs, stofnuð haustið 1986. Fyrsta útgáfa Smekkleysu var póstkort gefið út í tilefni leiðtogafundarins í Höfða. Afrakstur sölunnar var notaður til að fjármagna fyrstu plötu Sykurmolanna sem innihélt lagið „ammæli“. Haustið 1987 var lagið gefið út í Bretlandi og einkunnarorð Smekkleysu, „heimsyfirráð eða dauði“ fengu nýja merkingu í kjölfar þeirrar velgengni sem Sykurmolarnir nutu næstu árin og í framhaldi af því fleiri íslenskir listamenn. Á sýningunni gefur að líta úrval veggspjalda og annarrar útgáfu frá níunda áratugnum, einnig í aðdraganda stofnunar Smekkleysu þegar Grammið, Medúsa, Eskvímó og fleiri gáfu út efni listamanna sem tilheyrðu hinni svokölluðu nýbylgju sem hafði tileinkað sér einskonar sjálfsþurftarbúskap utan hefðbundinna útgáfufyrirtækja og varð sá grunnur ástæðan fyrir stofnun Smekkleysu. Sýningin stendur til 26. febrúar 2018.

Ritstjórn janúar 11, 2018 14:15