Sungið saman í Hannesarholti – Haukur Heiðar og synir

Syngjum saman með Hauki Heiðari, Halldóri og Hauki Heiðari

Sunnudaginn 8. apríl kl. 14 í Hannesarholti

 Feðgarnir Haukur Heiðar Ingólfsson og synir hans Halldór og Haukur Heiðar Haukssynir leiða samsöng í Hannesarholti sunnudaginn 8. apríl kl. 14. Haukur Heiðar Ingólfsson heimilislæknir og píanóleikari hefur um áratuga skeið glatt Íslendinga með píanóleik sínum, bæði á ferð og flugi um landið með Ómari Ragnarssyni og með fáguðum kvöldverðartónum. Geisladiskar hans með sígildum dægurlögum, jafnt leiknum sem sungnum, hafa notið mikilla vinsælda. Synirnir tveir hafa getið sér gott orð fyrir söng, hvor á sínu sviði. Haukur Heiðar yngri er þjóðkunnur sem söngvari hinnar vinsælu hljómsveitar Diktu, en Halldór hefur um árabil sungið með Mótettukór Hallgrímskirkju og fleiri kórum. Á söngskrá feðganna er fjölbreytt blanda af þekktum og skemmtilegum dægurlögum, sænskum vísum og söngvum um vorið.

Textar birtast á tjaldi og allir taka undir. Frítt fyrir börn í fylgd með fullorðnum sem greiða 1000 krónur.

Veitingahúsið í Hannesarholti er opið frá 11.30-17 og hefur í boði dögurð á undan söngstundinni og kaffi með meðlæti á eftir.

 

Ritstjórn apríl 4, 2018 10:24