Viskí – lífsins vatn

Námskeið um viskí verður haldið í Endurmenntun HÍ, Dunhaga 7, Reykjavík  þann 12.apríl næst komandi, klukkan 19:30 – 22:30. Almennt gjald á námskeiðið er 14.900 krónur, en ef menn skrá sig fyrir 2.apríl er gjaldið 13.500 krónur.  Kennari á námskeiðinu er Jakob Jónsson, sérfræðingur um viskí.

Viskí þótti löngum vera eldri – eða heldrimannadrykkur en tímarnir breytast og drykkjusiðir með og nú er viskí farið að höfða í auknum mæli til yngra fólks af báðum kynjum.

Það er gósentíð í viskíheiminum um þessar mundir og vinsældir þessa þjóðardrykkjar Skota eru að aukast gríðarlega um allan heim. Segja má að drykkurinn sé að ganga í gegnum endurnýjun lífdaga eftir mögur ár og er nú farinn að höfða til breiðari hóps af báðum kynjum og á öllum (löglegum) aldri.

Á námskeiðinu verður rýnt í sögu drykkjarins, hvernig hann varð til, mismun eftir tegundum og svæðum sem og muninn á blönduðum viskíum og einmöltungum. Við lítum á tunnurnar og hvaða hlutverki þær gegna. Ræðum hvernig viskíið breytist við þroskun og síðast en ekki síst verður dreypt á þessum guðaveigum.

Á námskeiðinu er fjallað um:

• Uppruna viskís og sögu.
• Framleiðsluferlið og hvað þarf til að búa til drykk sem má lagalega kalla viskí.
• Mismunandi tegundir og gerðir viskís.

Ávinningur þinn:

• Fræðast um viskí, þennan margslungnasta áfenga drykk veraldar með áherslu á skosk viskí.

Fyrir hverja:

Fyrir alla þá sem hafa áhuga á viskíi, jafnt byrjendur sem lengra komna og sannarlega eru 20 ára eða eldri.

Kennsla:

Jakob Jónsson hefur starfað um árabil sem verslunarstjóri í Lundúnaútibúi einnar virtustu viskíverslunar Bretlandseyja og þar með heimsins. Hann lifir og hrærist í viskíbransanum og heldur úti veftímaritinu viskihornid.com.

Ritstjórn mars 20, 2018 16:17