Sigurður E. Guðmundsson fyrrverandi framkvæmdastjóri Húsnæðisstofnunar ríkisins situr á Þjóðarbókhlöðunni og er að leggja síðustu hönd á doktorsritgerð sína í sagnfræði sem heitir Öryggi þjóðar frá vöggu til grafar og fjallar um sögu velferðar á Íslandi frá 1889 til 1946. Þetta er mál sem er Sigurði hugleikið, eftir þátttöku í pólitík og stjórn húsnæðismála um áratuga skeið.
Fór í sagnfræði
Sigurður hóf nám í læknisfræði eftir stúdentspróf en hætti og fór að vinna hjá Alþýðuflokknum og á Alþýðublaðinu. Hann var svo framkvæmdastjóri Húsnæðisstofnunar ríkisins í 27 ár, en þá var ekki óskað eftir starfskröftum hans lengur. Hann var 66 ára. Hann segist þá hafa ákveðið að nota næstu ár þannig, að það gagnaðist sér og öðrum sem best og ákvað að láta þann gamla draum rætast, að setjast á skólabekk í Háskóla Íslands. „ Mér leist best á sagnfræðina“, segir Sigurður, „og hef verið í henni í 16 ár. Ég byrjaði á byrjuninni, en byrjaði að undirbúa doktorsritgerðina fyrir 7 árum“. Það var um svipað leyti og hann missti eiginkonu sína Aldísi Benediktsdóttur. Hún var búin að stríða við veikndi í nokkurn tíma og hann tók sér hlé frá náminu þess vegna. Þegar ljóst var hvert stefndi sagði hún við hann „Þú heldur áfram þegar ég er farin“. Og það gerði hann.
Námið skemmtilegt og gefandi
Sigurður vinnur alla daga frá 9-5 á Þjóðarbókhlöðunni og er búinn að skrifa doktorsritgerð uppá 400 blaðsíður. Þær eru í yfirlestri áður en ritgerðinni verður skilað inn til endanlegrar afgreiðslu. Hann segir að námið hafi verið mikil lífsfylling. „Þetta er svo skemmtilegt og ég hef ekki tekið mér sumarfrí í mörg ár. Mér finnst sumarið svo góður vinnutími. Þá eru fáir hér, veðrið yndislegt og umhverfið dásamlegt. Maður situr hér í rólegheitum og reynir að pota þessu áfram. Ég held að námið eigi stóran þátt í því hvað ég hef haldið góðri heilsu“, sagði þessi síungi fræðimaður að lokum.
