- Gangið meira: Gangið minnst í klukkutíma þrisvar í viku og helst oftar. Nýleg rannsókn háskólans í British Columbia í Kanada sýndi fram á að göngutúrar geta aukið virkni heilans umtalsvert. Sértaklega var bent á að þeir, sem þjáðust af minniháttar æðaþrengingum og byrjuðu að ganga reglulega, mældust með lægri blóðþrýsting og sýndu framfarir í vitsmunalegum prófum. Hugræn skerðing, sem líklegast orsakast af þrengingum í æðum í heilanum, er talin vera önnur algengasta orsök minnisglapa á eftir Alzheimer sjúkdómnum.
- Farið meira út á meðal fólks: Sambandið á milli einmanaleika og Alzeimer sjúkdómsins er ekki fullkomlega sannað en ýmsar kannanir þykja sýna að það séu tengsl á milli sterks félagslegslegs nets og minni hættu á minnisglöpum. Í könnun sem náði yfir fjögur ár og náði til 800 einstaklinga 75 ára og eldri kom í ljós að einmana fólk var meira en tvisvar sinnum líklegra til að þróa með sér einkenni minnisglapa en þeir sem nutu félagsskapar náinna vina og ættingja. Jákvæðustu áhrifin sýndu sig hjá þeim sem voru ekki einungis félagslega virkir heldur líka hjá þeim sem voru líkamlega og andlega öflugir á sama tíma. Í enn stærri rannsókn þar sem rannsakaðar voru 2.249 konur 78 ára og eldri kom í ljós að þær sem voru með stærri hóp í kringum sig voru 26% ólíklegri til að þróa með sér minnistap en þær sem voru ekki með hóp í kringum sig. Í ljós kom að konur sem voru í daglegu sambandi við fjölskyldu og vini minnkuðu hættuna á minnistapi um nær helming.
- Verndaðu höfuðið: Í ljós kemur að það eru sterk tengsl á milli hættu á að þróa með sér Alzheimer sjúkdóminn og alvarlegra höfuðáverka, sér í lagi þegar áverkanum hafði fylgt meðvitundarleysi. Þess vegna er mjög mikilvægt að við verjum höfuðið með því að nota sætisbelti í bíl og hjálm við hjólreiðar eða íþróttaiðkun. Til að vera viss um að fólk sé varið heima við eins og frekast er kostur er gott að hafa eftirfarandi í huga: Gætið þess að gólfin séu hrein. Fjarlægið eða festið allar lausar mottur. Forðist að vaxbera gólfin. Gætið þess að sturtubotn eða baðkar sé ekki sleipt og að baðmottan sé með gúmmíbotni. Fjarlægið rafmagnssnúrur sem liggja á gólfum.
- Hugaðu vel að mataræðinu: Vertu viss um að mataræði sé ríkt af D-vítamíni sem er nauðsynlegt fyrir vitræna virkni. (Fyrir utan sólina er túnfiskur, lax og drykkir eins og d vítamínbætt mjólk og djús mjög ríkt af þessu nauðsynlega vítamíni). Í rannsókn sem stóð yfir í 6 ár og náði til 1.600 þátttakenda kom í ljós samhengi á milli D-vítamínsskorts og Alzheimer sjúkdómsins. Þeir sem voru illa haldnir af D-vítamínskorti voru meira en tvisvar sinnum líklegri til að þróa með sér Alzheimer sjúkdóminn og vitglöp en þeir sem voru með fullnægjandi magn af D-vítamíni í líkamanum. Ljóst er að að ofþyngd, sykursýki, hár blóðþrýstingur og hátt kólesteról eru allt áhættuþættir varðandi minnisglöp. Því er mikilvægt að tala við lækni um mataræði og daglega kaloríuinntöku. Meira af grænmeti og minna af rauðu kjöti er talið draga úr hættu á vitglöpum. Og svo eru vondar fréttir fyrir þá sem drekka mikið af “diet” drykkjum því nýjar rannsóknir sýna að gervisykurinn í þessum dykkjum hefur verið tengdur við meiri hættu á vitglöpum og heilablóðfalli.
- Gættu að svefninum: Reyndu að fá nægan svefn þar sem of lítill svefn getur stuðlað að minnistapi. Svefnleysi gerir að verkum að náttúrulegt hreinsikerfi líkamans fær ekki frið til að vinna. Þetta kerfi fjarlægir prótein sem geta breyst í efni sem stuðla að minnisglöpum. Þetta gerist á meðan þú sefur. Það er goðsögn að fólk þurfi minni svefn með aldrinum. Nú er vitað að betri andleg og líkamleg heilsa er beintengd við nægan svefn.
