Líklega hafa allar borgir sinn sjarma og eitthvað það við sig sem vekur bæði hrifningu og annað sem veldur angurværð. Hins vegar er nokkuð víst að fáar ef nokkrar borgir búi yfir þversögnum í jafnríkum mæli og Berlín. Borg sem var klofin í tæpa þrjá áratugi og íbúar létu lífið við að reyna að komast milli hverfa vegna þess að öðru megin var frelsi en hinum megin alræðisstjórn.
Nú á dögum sjást þess fá merki að eitt sinn hafi múr aðskilið austur- og vesturhluta borgarinnar. Múrinn var að mestu brotinn niður frá því í nóvember árið 1989 og fram í júní árið eftir og molarnir bornir burtu af fagnandi almenningi. Hluti hans stendur þó enn við bakka árinnar Spree, skreyttur listaverkum og þar er hægt að fá tilfinningu fyrir því hversu nærri ættingjar og vinir voru hverjir öðrum þótt þeim væri gert ómögulegt að snertast eða hittast. Verkin á múrnum segja einnig táknræna og áhrifamikla sögu sem minnir á að átök koma alltaf verst niður á saklausu fólki. Einnig er hægt að heimsækja hina frægu landamærastöð Check Point Charlie og skoða þar safn sem segir í máli og myndum frá þessum tíma.
Safnaeyjan
Við austurenda Unter den Linden breiðgötunnar er beygt og gengið yfir brú yfir í eyju á ánni Spree sem almennt er kölluð Museum Inseln. Þar er að finna fimm helstu söfn borgarinnar þar á meðal hið stórglæsilega og áhrifamikla Pergmon en þar má sjá stórkostlega fornmuni alls staðar að úr heiminum. Einnig má nefna Neus Museum en kjörgripur þess að brjóstmyndin af Nefertiti frá Egyptalandi hinu forna. Sjálfsagt eru fáir sem ekki hafa séð mynd af henni eða heyrt um hana talað. Fæstum nægir dagur til að skoða sig um í þessum stórmerkilegu söfnum og vel þess virði að eyða nokkrum dögum í að skoða þau hvert á fætur öðru.
Græni skógur
Grunewald er stærsta græna svæði Berlínar. Þangað er auðvelt að komast með lest og notalegt að ganga eftir skógarstígum og njóta kyrrðarinnar. Á góðviðrisdögum er hægt að baða sig í Wannsee eða Schlachtensee og eins er gaman að ganga upp á Teufelsberg, hæð sem bandamenn reistu í stríðslok úr hluta af því sem hreinsað var úr rústum borgarinnar, enda Berlín mjög illa farin eftir látlausar loftárásir bandamanna.
Gengið upp í turninn
Vegna þess hve illa borgin fór í stríðinu er mikið af nýlegum og framúrstefnulegum byggingum þar. Ein þeirra er Reichstag, eða þinghús Þjóðverja, en þaðan er einstakt útsýni yfir borgina. Byggingu þinghússins lauk árið 1864 en það þurfti mikilla viðgerða við eftir stríð og breski arkitektinn Norman Foster var fenginn til að gera það upp. Viðgerðunum lauk árið 1999 og þakið er allt gert úr gleri og þaðan er hægt að horfa yfir borgina til allra átta. Annar stórkostlegur útsýnisstaður er Kolhoff-turninn sem gnæfir 200 metra hár yir Alexanderplatz. Hann er fjórða hæsta bygging Evrópu og á heiðskírum degi er sjóndeildarhringurinn allt að 40 km..
Innsýn í austurþýskan menningarheim
Austurþýska alþýðulýðveldið DDR leið undir lok árið 1990. DDR safnið veitir innsýn inn í líf þeirra sem lentu austan megin í stríðslok en þar má róta í skúffum fullum af minjagripum um framleiðslu og líf fólks austan járntjaldsins og setjast inn í íbúð sem hlustunarbúnaði hefur verið komið fyrir í. Að auki geta ævintýragjarnir farið í ferð um borgina á Trabant.
Gyðingar í Berlín
Útrýmingarbúðir nasista eru svartur blettur á þýskri sögu. Jüdisches Museum er menningu og sögu gyðinga í Þýskalandi gerð skil. Safnbyggingin er einkar athyglisverð og nýjasta viðbótin er höfundarverk gyðingsins og arkitektsins Daniel Libeskind. Hún er í laginu eins og Davíðsstjarnan og er að innan sannakallað völundarhús.
