Fyrir mörgum var það svo að þegar klukkur Dómkirkjunnar hringdu inn jólin í Útvarpinu, voru komin jól og hægt að segja gleðilega hátíð með sanni. Á vef Ríkisútvarpsins kemur fram að messa frá Dómkirkjunni í Reykjavík var það eina sem var á dagskrá Útvarpsins á aðfangadag á stofnárinu árið 1930. Jólamessan klukkan sex er eini dagskrárliðurinn sem haldist hefur óbreyttur frá upphafi í dagskrá Rásar 1. Í ár er það séra Hjálmar Jónsson sem predikar en séra Sveinn Valgeirsson þjónar fyrir altari.
Kirkja biskupsins
Dómkirkjan í Reykjavík á sér merka sögu eins og kemur fram í bók séra Þóris Stephensen, Sögu Dómkirkjunnar frá árinu 1996. Þar segir meðal annars: „Dómkirkjan í Reykjavík var vígð árið 1796 og var fyrsta byggingin sem reist var sérstaklega með tilliti til þess að Reykjavík skyldi verða höfuðstaður landsins. Tæpri öld síðar var svo Alþingishúsið reist þétt við kirkjuna. Síðar hafa þessi tvö hús myndað heild í hugum landsmanna og táknað órofa samhengi laga og siðar í landinu. Dómkirkjan hefur verið vettvangur stórra atburða í lífi íslensku þjóðarinnar, einstaklinga, fjölskyldna, samfélags. Við þingsetningar ganga alþingismenn til Dómkirkjunnar og hlýða á guðsþjónustu og eins við embættistöku forseta Íslands. Dómkirkjan er kirkja biskups Íslands, þar sem hann vinnur flest embættisverk sín. Umfram allt er Dómkirkjan þó sóknarkirkja, fyrst allra Reykvíkinga en nú gamla Vesturbæjarins og næstu hverfa til austurs.
Stílhreint hús
Dómkirkjan er stílhreint og fagurt hús, í nýklassískum stíl og fagurlega prýdd. Gólfið í kirkjunni er lagt ljósum steinflögum. Setloft er í kirkjunni beggja vegna.Þegar komið er inn í forkirkjuna blasir við tafla yfir dyrum og er á ritað erindi eftir sr. Hallgrím Pétursson í ramma sem Ríkharður Jónsson, myndhöggvari gerði: “Þá þú gengur í Guðs hús inn…” Á veggjum forkirkju eru gipsmyndir eftir Albert Thorvaldsen. Sýna þær guðspjallamennina Lúkas og Jóhannes, en honum var Víkurkirkja helguð.Yfir altarinu blasir við altarismynd G. T. Wegeners, hirðmálara frá 1847, Upprisa Drottins. Þetta er áhrifamikið listaverk og eru eftirmyndir hennar víða í kirkjum landsins. Undir myndinni er letrað: Svo sem Drottinn hefur uppvakið Krist svo mun hann oss uppvekia.
Mesti dýrgripurinn
Loftið yfir kórnum er markað bláum flötum með gylltum stjörnum. Yfir gluggunum eru átta englamyndir, sem eins prýða prédikunarstólinn.Altarið er klætt rauðu flaueli sem prýtt er silfurskrauti sem Halldór Kristinsson, silfursmiður gerði 1956 og ´58. Fyrir miðju er silfurkross og umhverfis vínviður og eru þrúgurnar myndaðar af íslenskum glerhöllum, agat.Skírnarfontur Alberts Thorvaldsen er einn mestu dýrgripa þjóðarinnar. Hann kom í Dómkirkjuna árið 1839 og ber ártalið 1827 en þá var hann gerður í Rómaborg þar sem listamaðurinn starfaði lengi. Á framhlið fontsins er mynduð skírn Jesú af Jóhannesi skírara, á norðurhlið eru sömu persónur á barnsaldri með Maríu Guðsmóður og á suðurhlið er Jesús að blessa börnin. Á bakhlið er letrað á latínu:Reisti smíð þessa í Róm suður Albert Thorvaldsen ættjörðu sinni, Ísalandi, gefandi hana af góðum hug. (Jónas Hallgr.)Prédikunarstóll Dómkirkjunnar er mikil listasmíð af hendi Winstrups sem og umgjörð altarismyndarinnar. Stíllinn er ný-barrok og fellur ásamt öðrum skreytingum vel að nýklassískum stíl kirkjunnar. Á prédikunarstólinn er letrað: Sælir eru þeir sem heyra Guðs orð og varðveita það.“
Heimildir: Vefur RÚV og Saga Dómkirkjunnar, Þórir Stephensen, Reykjavík 1996.
