Þurfa ekki að sýna skilríki í göngferðunum

Þeir sem ganga reglulega í náttúrunni þekkja kraftinn sem sækja má í þessa orkuuppsprettu sem náttúran er. Það er sama hvort gengið er meðfram sjónum, uppi á fjöllum, á heiðum eða innan borgar- og bæjarmarkanna því alls staðar er náttúran söm við sig, kraftmikil, heillandi og gefandi. Sá sem nýtur þeirra forréttinda að geta komist  í tæri við ómengaða íslenska náttúru ætti ekki að láta það fram hjá sér fara.

Ferðafélag Íslands stendur fyrir spennandi gönguferðum á stór Reykjavíkursvæðinu ætlað félögum á eftirlaunaaldri. Þetta eru hressandi gönguferðir um falleg svæði en ólík og verður gengið tvisvar sinnum í viku í febrúar, mars og apríl. Ferðirnar eru félögum FÍ að kostnaðarlausu en þeir sem ekki eru í félaginu eða vilja ekki vera þar, geta greitt sérstaklega fyrir þetta verkefni.

Heiðrún ásamt föður sínum Ólafi Sveinssyni og tvíburabróður hans Guðjóni á Esjunni á nýársdag 2020 en þeir urðu 73 ára í desember sl.

Markmiðið að fá fólk út

,,Þessar ferðir eru hugsaðar fyrir félaga okkar á eftirlaunaaldri en við biðjum nú ekki um skilríki,“ segir Heiðrún Ólafsdóttir leiðsögumaður hlæjandi, þegar spurt er um aldurstakmörk. ,,Markmiðið er að fá fólk út hversu gamalt eða ungt það er!“

Hvers vegna ferðir fyrir eldri borgara?

,,Í félaginu okkar, Ferðafélagi Íslands, eru margir eldri félagar sem hafa fylgt félaginu í fjölda ára. Sumir hverjir treysta sér kannski ekki lengur í erfiðari ferðir en hafa gaman af hreyfingu og vita hvað það er gott og gefandi að fara í góðan göngutúr með góðu fólki. Það uppsker  hreyfingu, skemmtilega samveru, góðan félagsskap, útiveru í fallegu umhverfi og gott loft á einu bretti. Það gerist ekki betra.“

Gengið tvisvar í viku í 3 mánuði

Hvernig er skipulagið í þessum ferðum?

,,Fyrsta ferðin verður 10. febrúar og sú síðasta er áætluð 4. maí. Við munum hittast tvisvar sinnum í viku, alla mánudaga og alla miðvikudaga á þessu tímabili og alltaf er áætlað að leggja af stað klukkan tíu. Á mánudögum verður alltaf hist við Toppstöðina í Elliðaárdalnum og gengið um dalinn í rúman klukkutíma. Á miðvikudögum verður farið víða um höfuðborgarsvæðið og má t.d. nefna að í fyrstu ferðinni verður gengið um Vífilstaðavatn rúma 2 km en næsta ferð á eftir verður um Öskjuhlíðina. Þá munum við hittast við Nauthól og ganga u.þ.b. 4 km. Þessar gönguferðir eru allar á jafnsléttu og verður gengið að jafnaði í 60 – 90 mínútur.“

Þurfa að vera í góðum skóm

Þarf sérstakan klæðnað eða útbúnað í þessar ferðir?

,,Nei, alls ekki. Eina sem fólk þarf að huga að er að vera í góðum skóm eins og alltaf þegar farið er út að leika sér. Léttir gönguskór eða strigaskór með grófum sóla henta vel en stígvél og sandalar henta ekki í þessar ferðir. Þeir sem eru vanir að ganga með göngustafi ættu að taka þá með en mörgum finnst verra að vera með slíka stafi svo þeir skilja þá eftir heima. Svo er eins og alltaf að klæða sig eftir veðri og muna að það er aldrei vont veður á Íslandi! Við förum að sjálfsögðu aldrei af stað í brjáluðu veðri – það gefur auga leið.“

Þarf fólk að taka með sér nesti?

,,Nei, alls ekki. Þar sem við erum að miða við ekki lengri ferðir en rúman klukku tíma á ekki að vera þörf á nesti en aftur á móti gætu þessar ferðir boðið upp á að þeir sem hefðu áhuga á gætu farið saman á kaffihúsi eftir gönguna og fengið sér kaffi og eitthvað með því. Þannig gætu ný vinasambönd orðið til. Þetta er þó ekki hluti af ferðinni en gæti verið gaman. Ég gæti alveg hugsað mér að stuðla að því. Maður er jú alltaf manns gaman.“

Er fjöldatakmörkun í þessum ferðum?

,,Nei, við erum ekki með neinar fjöldatakmarkanir. Allir sem hafa áhuga á og treysta sér til eru velkomnir í hópinn.“

Eru ekki að finna upp hjólið

Heiðrún Ólafsdóttir verður fararstjóri í þessum ferðum en hún hefur skipulagt verkefnið frá upphafi. Hún hefur verið skálavörður og leiðsögumaður hjá FÍ í nokkur ár.

Ég bjó eins sex ár í Danmörku þar sem ansi lítið er um fjöll og ég verð að viðurkenna það að fjöllin og útiveran er eitt af því sem dró mig heim aftur. Ég saknaði líka mikið ofstopans í íslenska veðrinu sem við eigum svo mikið af en Danir allt of lítið,“ sagði Heiðrún brosandi að lokum.

 

Ritstjórn febrúar 10, 2020 15:02