Ýmsir halda því fram að hugmyndir okkar um aldur séu að breytast. Lifðu núna snaraði þessari litlu grein eftir Thomas Helsbo yfir á íslensku, en greinin birtist á vef danska Ríkisútvarpsins og þar má sjá hverju Danir eru að velta fyrir sér varðandi aldurinn. Sjá meira.
Hér áður fyrr voru það þeir eldri sem nutu virðingar og fóru með völdin í samfélaginu. Yngra fólk þurfti að taka tillit til þess. Þetta breyttist eftir að unglingarnir gerðu uppreisn á sjöunda áratugnum. Þá var farið að tengja ungan aldur við frelsi og nýjar hugmyndir en líta svo á að það sem væri gamalt væri í eðli sínu slæmt. Síðustu áratugi hafa völdin verið að færast til yngra fólksins og það hefur orðið meira áberandi í fjölmiðlum en áður var. Í danska sjónvarpsþættinum Besti aldurinn, hafa Danir úr menningar- og listalífi lýst því hvernig þeir upplifa þetta.
Menningarlífið er að fá nóg af unglingum
„Við erum farin að sjá fyrstu merki þess, að áhersla vestrænnar menningar á æskuna sé farin að minnka“, segir Else Skjold tískusérfærðingur. „Áratugum saman hefur allt snúist um unga fólkið. Ég held að markaðurinn sér orðinn mettaður af æskunni, þannig að menn séu búnir að fá nóg“, segir hún.
Aldur og tjáning er að breytast
Elsa segir að það sjáist til dæmis á því, að á síðustu árum hafi það aukist að eldri fyrirsætur komi fram í tískuauglýsingum og á tískusýningum. Fyrir tíu árum síðan hafi það alls ekki tíðkast „Mér sýnist að mál séu að þróast í þá átt að menn ákveði aldur sinn sjálfir. Þannig er hægt að vera 25 ára, en samt 65 ára í sér og klæða sig þannig. Og svo getur þetta verið alveg þveröfugt, þannig að einhver sem er 65 ára klæði sig í strigaskó með blikkandi ljósum og sé eldri „hipster“, án þess að það veki sérstaka athygli. Þannig er búið að víkka út möguleika fólks“, segir hún.
Ef þekktir einstaklingar eru spurðir, þá kemur í ljós að það er ekki eingöngu slæmt að eldast og öðlast meiri reynslu.
