Þessi réttur verður fljótt uppáhald lambakjötsunnandans. Uppskriftin er upphaflega úr smiðju Úlfars Finnbjörnssonar, eins helsta matreiðslumeistara landsins. Með þessari eldunaraðferð verður kjötið svo meyrt að ekki er þörf á sósu. Margir kjósa þó að bera sósu fram með lambakjöti og þá passar sveppasósa mjög vel með.
800 g lambaprime í 2 sm þykkum sneiðum
salt og nýmalaður pipar
olía til steikingar
2 msk dijon sinnep
1 msk brauðrasp
2 msk. ferskt tímían
Bankið steikurnar létt með buffhamri og kryddið með salti og pipar. Steikið í vel heitri olíunni á pönnu í 1 mínútu á hvorri hlið og leggið síðan í ofnskúffu. Blandið sinnepi, raspi og tímíani og penslið steikurnar með blöndunni. Setjið steikurnar í 180°C heitan ofn í 3-4 mínútur og berið þær síðan fram með mörðu kartöflunum og blönduðu grænmeti.
Marðar kartöflur með lárperu
400 g soðnar og afhýddar kartöflur
30 g smjör
1 msk. ferstk kóríander, smátt saxað
salt og nýmalaður pipar
1 lárpera (avocado), afhýdd og steinninn fjarlægður
Setjið allt nema lárperuna í skál og merjið gróflega. Skerið lárperuna í bita og blandið saman við kartöflumaukið.
