Þvagsýrugigt er krónískur sjúkdómur sem á sér erfðafræðilegar rætur. Hingað til hefur tilhneiging verið til að kenna lífsstíl þeirra sem þjást af henni um og talað um mataræði, hreyfingarleysi og aðrar óhollar lífsvenjur þegar menn leita sér hjálpar. Þvagsýrugigt stafar af því að þvagsýra safnast fyrir í blóðinu og myndar beitta kristalla í og við liðamót. Þegar ónæmiskerfi líkamans ræðst á kristallana til að útrýma þeim veldur það bólgum og miklum sársauka.
Nýleg rannsókn sýnir fram á að erfðir leika mun stærra hlutverk í hverjir fá þvagsýrugigt og hverjir ekki en áður var talið. Þetta á sérstaklega við um hvort ónæmiskerfið ræðst til atlögu við þvagsýrukristallana eður ei og hvernig þvagsýran er flutt um líkamann. Vísindamennirnir sem stóðu að rannsókninni telja að þessar niðurstöður hjálpi þeim að skilja sjúkdóminn betur og það geti opnað þeim leiðir að betri og árangursríkari meðferð við honum. Þeir benda hins vegar á að frekari rannsóknir þurfi til að staðfesta þessar niðurstöður og kanna hvaða erfðafræðilegu þættir stjórna hér mestu.
Þvagsýrugigt kemur og fer og nokkrar leiðir eru til að meðhöndla hana. Sú algengasta er að gefa lyf sem koma í veg fyrir að þvagsýra safnist upp í líkamanum og eins geta breytingar á mataræði skipt miklu hvað það varðar. Undanfarin ár hefur þeim fjölgað sem þjást af henni og þess vegna hafa læknar gjarnan vilja kenna um breyttum lifnaðarháttum.
Steingerður Steinarsdóttir ritstjóri Lifðu núna skrifar.
