Mikil lifandis býsn er alltaf gaman að fá í hendur nýja bók eftir Jónínu Leósdóttur. Maður veit að síðurnar iða hreinlega af lífi og fjöri. Bráðskemmtilegar persónur stíga fram og Jónína er hreinlega sérfræðingur í að bregða upp spegli fyrir okkur íslensku kerlingarnar að skoða okkur í. Maður kannast við sumar týpurnar og þekkir sjálfan sig í öðrum. Algjör Perla er engin undantekning frá þessari reglu og hún Perla er sko algjör perla.
Sagan byrjar með látum. Perla Kristófersdóttir liggur á Landspítalanum lömuð á vinstri hlið eftir heilablóðfall og fyrsta hugsunin er að hún verði að komast sem fyrst á fætur til að geta flutt líkið af heimili sínu. Hamingja og velferð fjölskyldu hennar er í húfi og lesandinn umsvifalaust spenntur. Hvernig stendur á að virðuleg kona á sjötugsaldri geymir lík heima hjá sér? Af hverjum er það? Og hvar er það? Er ekki hætta á að aðrir finni það? Öllum þessum spurningum er auðvitað svarað eftir því sem sögunni vindur fram og þótt enginn geti verið fylgjandi því að hylmt sé yfir glæp er eiginlega ekki annað hægt en að halda með Perlu og óska þess að henni takist ætlunarverkið þrátt fyrir fötlun og aðra erfiðleika, eins og óvæntan leigjanda sem flytur inná hana og er leigufrír.
Þetta er ekki hefðbundin sakamálasaga í venjulegum skilningi þótt lík komi við sögu. Hér er engin rannsókn í gangi, ekki leit að morðingja heldur þvert á móti, spennan felst í því hvort okkar kona komist upp með fela glæp. Eins og í öðrum bókum Jónínu er fléttan drifin áfram af þessum dásamlegu persónum samúð lesandans með þeim. Nú og svo eru auðvitað allar óborganlegu uppákomur sem alltaf henda í bókum Jónínu, eitthvað sem er með ólíkindum en gæti sannarlega gerst í íslenskum raunveruleika. Algjör Perla er hrein skemmtun frá upphafi til enda.
Steingerður Steinarsdóttir ritstjóri Lifðu núna skrifar.
