Könnunin Greining á högum og líðan aldraðra á Íslandi árið 2016, var gerð af Félagsvísindastofnun Háskóla Íslands fyrir velferðarsvið Reykjavíkurborgar, velferðarráðuneytið og Landssamband eldri borgara. Þetta er landskönnun sem náði til 1800 manns á aldrinum 67 ára og eldri. Næstum 90% þeirra búa í eigin húsnæði, en 6% búa í leiguhúsnæði eins og sjá má í töflunni sem fylgir hér með.
Þeir sem leigja, og eru samkvæmt könnuninni 6% þessa aldurshóps, eru flestir í leiguíbúðum í eigu félagasamtaka eða 31%. 28% þessa hóps leigja á almennum markaði, en 25% eru í leiguíbúðum í eigu sveitarfélaga. 17% eru í annars konar leiguhúsnæði. Fjöldi þeirra í landinu sem er 67 ára og eldri, telur um 40.000 manns. Samkvæmt því eru um 2400 í hópnum á leigumarkaði.
Samkvæmt könnuninni búa 34% eldra fólks ein. Sextíu prósent búa hins vegar á heimili, þar sem tveir búa saman. Einungis 6% búa á heimili þar sem eru þrír eða fleiri.
Þessi aldurshópur, fólk á aldrinum 67 ára og eldra, virðist ekki vera í þeim hugleiðingum að skipta um húsnæði á næstu árum. Rúmlega 70% svara spurningu um það neitandi. En 18% hópsins segjast hafa skipt um heimili á síðast liðnum fimm árum og 10% segjast ætla að skipta um heimili á næstu fimm árum. Þegar þessi 10% eru spurð hvers vegna, segist rúmlega helmingur gera það til að minnka við sig, en 26 % vilja komast í hentugra húsnæði. Aðrir nefna fjárhagsástæður eða 16% og 14% segjast vilja minnka við sig vegna aldurs.
