Friðrik Salvar Bjarnason er annar stofnenda nýrrar íslenskrar hljóðbókaveitu sem fengið hefur nafnið Sagnaland. Um er að ræða spennandi valkost fyrir bókaunnendur því auk þess að bjóða upp á fjölda íslenskra bóka hafa þeir félagar búið til þætti og skemmtileg innslög um bókmenntir sem auðga og bæta upplifunina. Á Sagnalandinu er starfandi bókaklúbbur, barnahorn þar sem finna má nýjustu og bestu barnabækurnar þegar þarf að skapa afþreyingu fyrir litla gesti og að auki viðtöl við höfunda um verk þeirra.
Hver er hugmyndin að baki Sagnalandinu? Af hverju var farið út í að stofna hljóðbókaveitu?
„Við erum tveir saman í þessu, ég og Lúðvík Páll Lúðvíksson. Við komum báðir úr sjónvarpsbransanum og erum búnir að vinna þar nokkuð lengi. Hann hefur verið að framleiða efni hjá ORCA Films m.a. „Viltu finna milljón“ og „Idol“ og ég hef mest framleitt enska boltann þegar hann var á Símanum og hlaðvarpið „Beint í bílinn“. Við sáum að þarna var gat í markaðnum, sérstaklega í ljósi þess að óánægja hefur verið með einokunarstöðu Storytel og við vildum athuga hvort við gætum ekki boðið betur.“
Hallgrímur Helgason og Sveppi ræða um 60 kílóa-bækurnar.
Bókaklúbbur og skemmtilegt bókaspjall
Lykillinn að góðu bókasafni hvort sem er á netinu eða í raunheimum er auðvitað úrvalið. Hvernig gekk ykkur að fá bækur?
„Mjög vel,“ segir Friðrik. „Við höfðum strax samband við öll forlögin og fengum góðar viðtökur. Við erum búnir að ná samningum við allar helstu bókaútgáfur landsins sem veitir okkur aðgengi að þeirra bókum. Við bjóðum þegar upp á hátt í tvö þúsund bækur allar á íslensku.“
Það er vel að verki staðið sérstaklega í ljósi þess að aðeins eru nokkrir dagar síðan Sagnaland opnaði. Víðast hvar erlendis er mikil samkeppni á hljóðbókamarkaði en hér hefur einn aðili verið nánast einráður á markaði og rithöfundar ekki verið nægilega ánægðir með stöðuna og því leitað til Samkeppniseftirlitsins. En er ætlun þeirra félaga að framleiða eigið efni og hver er þeirra sérstaða?
GDRN les Bétveir í Barnahorni Sagnalands
„Sérstaða okkar er helst sú að við ætlum að bjóða upp á efni á íslensku og halda okkur þar. Allt sem er á veitunni er því á okkar tungumáli og við viljum tryggja að tekjur af íslenskum bókum haldist á Íslandi og styrki íslenskt bókmenntalíf. Nú hefur ekki verið neitt launungarmál að rithöfundar hafa ekki verið sáttir við sinn hlut og við ætlum að gera betur. Við viljum ekki vera í samkeppni við höfunda og forlögin sjálf. Ætlunin er ekki að setja eitthvað eitt ofar öðru. Við viljum vera hlutlaus aðilli á markaði, veita en ekki framleiðandi.
Hjá okkur vinnur Katla Ársælsdóttir bókmenntafræðingur og hún sér um að flokka og raða upp bókunum. Við erum líka að framleiða þætti til dæmis má nefna að við erum með Bókaspjall Sveppa. Sennilega átta sig ekki margir á hve víðlesinn hann er og að hann hlustar nánast daglega á bækur. Við fengum hann til að taka viðtal við Hallgrím Helgason um 60 kílóa-bækurnar. Í hlustun er hver bók í þeirri seríu rétt rúmir 20 tímar. Sveppi var þegar búinn að hlusta á þær allar og ekki var komið að tómum kofanum hjá honum þegar hann settist niður til að taka viðtal við Hallgrím um hans störf. Við ætlum að halda áfram með þá þætti og fjalla um fleiri bækur sem Sveppi þekkir vel. Þetta eru þættir í léttum dúr en þó alvarlegir og taka mið af verkinu sem er til umfjöllunar.“
Steindi jr. les bókina Stúfur úr seríunni Skemmtilegur smábarnabækurnar.
Eru rétt að byrja
Friðrik og Lúðvík Páll vinna þessa þætti af fagmennsku enda báðir þaulvanir sjónvarpsvinnu. Þetta er því ekki eins og hlaðvarp heldur á sama gæðastaðli og sjónvarpsþættir. En það er fleira skemmtilegt að finna á Sagnalandi.
„Katla er bókmenntafræðingur og hún er búin að stofna bókaklúbb á vefnum og tekur fyrir eina bók í mánuði. Það er gert líka í mynd og fólk getur fylgst með og jafnvel komið með innlegg í umræðuna. Bókaklúbburinn er í þróun en fyrsti þátturinn er kominn í loftið. Þar tala Katla og Ingibjörg Iða, sem er gagnrýnandi í Kiljunni, um uppáhaldsbók Ingibjargar, Skugga-Baldur eftir Sjón. Með okkar bakgrunn úr sjónvarpsvinnunni veitist okkur auðvelt að stökkva í svona framleiðslu. Ég var t.d. núna að koma frá því að taka upp innslag með Pétri Jóhanni og Jóni Ársæli fyrrverandi sjónvarpsmanni þar sem þeir ræddu m.a. um bókina hans sem er að koma út á hljóðbók. Það má segja að við séum rétt að byrja.
Mig langar líka að nefna að við erum með bókaflokkinn, Frægir lesa. GDRN tekur þar fyrir bókina Bétveir og Steindi Jr. les bókina Stúfur úr seríunni Skemmtilegu smábarnabækurnar, Emmsjé Gauti les Hulk-sögu og Sverrir Bergmann les Dimmalimm. Okkur langaði að búa til skemmtilega vinkla á þessar sögur. Við Lúðvík Páll eigum báðir ung börn og mín hlusta á Láru á hverju einasta kvöldi. Stundum langar mann að finna eitthvað annað til að vekja áhuga þeirra á og Barnahornið býður upp á nýjustu og bestu barnabækur landsins. Mig vantaði að skapa mér einhvern stað þar sem ég hefði lista yfir bækur sem ég gæti leitað í fyrir þau enda hef ég ekki endilega yfirsýn yfir þær fjölmörgu barnabækur sem hafa komið út á undanförnum árum. Þess vegna er gott að geta farið á einn stað og fundið allt það helsta. Þetta er líka gott þegar krakkar koma í heimsókn og vantar góða afþreyingu.“
Þess má geta að nú eru í gangi opnunartilboð þar sem þú getur hlustað frítt fyrsta mánuðinn og ætlunin er að valmöguleikar í áskrift verði fjölbreyttari en hingað til hefur tíðkast á þessum markaði. Til dæmis má nefna að hægt er að kaupa staka bók sem er auðvitað kjörið fyrir þá sem ekki vilja binda sig í mánaðaráskrift en langar að hlusta á eina og eina bók. Síðan eru það áskriftarleiðirnar sem eru frá 10 tímum á mánuði og upp í ótakmarkaða áskrift sem opnar lestrarhestum eða hlustunarhestum aðgang að öllu efni og þeir geta hlustað svo lengi sem eyrun þola. Áhugasamir geta skoðað á vefslóðinni: https://sagnaland.is
