Ítalir eru þekktir fyrir dýrlegar súpur og þekktust þeirra er sennilega MINESTRONE en hún er ein sú vinsælasta að útbúa á köldum vetrarkvöldum. Til eru óteljandi útgáfur af þessari dásamlegu súpu en ferskt grænmeti og pasta eru yfirleitt meðal innihaldsefna. Þessi útgáfa sem hér birtist byggir á þeirri ítölsku og er margprófuð. Saman við hana má svo setja gúllasbita og verður hún þá enn matarmeiri.
2 msk. ólífuolía
1 stór eða 2 litlir laukar
1 lítið eggaldin (má sleppa)
3 gulrætur
2 sellerístilkar
3-4 kartöflur
3 msk. tómatkraftur
1/2 brokkólíhöfuð, hlutað í sundur
1 dós niðursoðnir tómatar
1- lítri gnænmetissoð (teningur og soðið vatn)
ítölsk kryddblanda (Italian seasoning)
salt og grófmalaður pipar eftir smekk
2 dl pasta (pastaskrúfur eða penne pasta)
2 msk. fersk steinselja
Hitið olíuna í potti og mýkið smátt skorinn laukinn í henni. Skerið eggaldinið, gulræturnar, selleríið og kartöflurnar í litla bita og bætið út í pottinn og mýkið það í nokkrar mínútur í heitri olíunni. Bætið síðan tómatkraftinum, brokkólíinu, tómötunum og grænmetissoðinu út í og kryddið eftir smekk með ítölsku kryddblöndunni og salti og pipar. Látið malla við vægan hita í klukkustund. Sjóðið pastað í öðrum potti samkvæmt leiðbeiningum á pakka. Látið renna af því í sigti og bætið út í súpuna. Að lokum er steinseljunni bætt saman við og súpan borin fram. Og hún er ekki verri daginn eftir, tilvalin í nesti í vinnuna.
