Alfredo kartöflur með parmesan

Ágústa Gísladóttir eigandi Lín Design er listakokkur og nýtur þess að standa í eldhúsinu og matbúa eitthvað gott fyrir fólkið sitt. Hún féllst á að deila með lesendum Lifðu núna nokkrum af sínum uppáhaldsuppskriftum. Hér er dásamlegt meðlæti með grillmatnum á ferð.

Rjómakenndar kartöflur sem passa fullkomlega með grilluðu lambi, nautakjöti eða kjúklingi.

1. Sjóðið kartöflurnar
Sjóðið kartöflurnar í 10–15 mínútur eða þar til þær eru rétt að verða mjúkar. Hellið vatninu af og látið þær gufa í 2–3 mínútur.

2. Brúnið kartöflurnar
Bræðið íslenska smjörið á stórri pönnu. Bætið kartöflunum út á og brúnið þær þar til þær fá fallegan gylltan lit.

3. Bætið lauknum út á
Saxið skalottlaukinn smátt og hvítlaukinn fínt. Lækkið hitann og bætið lauknum út á pönnuna. Látið mýkjast við vægan hita í 3–4 mínútur þar til laukurinn verður glær og ilmandi. Gætið þess að hvítlaukurinn brúnist ekki.

4. Kryddið
Stráið kartöflukryddi og flögusalti yfir og hrærið vel saman.

5. Gerið Alfredo-sósuna
Hellið rjómanum yfir kartöflurnar og bætið rifnum parmesanosti saman við. Látið malla við vægan hita í 5–8 mínútur þar til osturinn hefur bráðnað og sósan þykknað.

6. Berið fram
Stráið ferskri steinselju yfir og berið fram heitt.