Stefnumótavefur býður upp á matreiðslunámskeið

Björn Ingi Halldórsson.

Það er hægt að finna ástina sama á hvaða aldri fólk er. Einn af þeim sem hefur hjálpað fólki finna að nýjan ástvin er Björn Ingi Halldórsson forritari og eigandi vefjarins Makaleit.is. Vefurinn hefur verið í lofinu frá því snemma árs 2013. Í dag eru um 950 virkir notendur á vefnum, flestir á aldrinum 40 til 70 ára. Það skemmtilega er að kynjahlutföllin á Makaleit.is eru nánast jöfn, um 50 prósent konur og álíka margir karlar.

Björn Ingi segir að honum þyki mjög vænt um vefinn og öll þau góðu skilaboð sem hann hafi fengið frá fólki í gegnum tíðina. Hann segir að notendur séu duglegir að hafa samband og láta vita hvernig hafi gengið og hvað þá langi til að boðið sé upp á.  „Það er algengt að fólk hafi samband og segi að það langi til að hitta aðra sem eru í svipuðum sporum og það sjálft í öruggu umhverfi. Þetta varð til þess að ég ákvað að bjóða upp á hraðstefnumót á Hressó. Þau gengu vel og fólk var nokkuð ánægt. Fólk hafði tækifæri til að hittast og ræða stuttlega saman. Svo fékk ég ábendingar um að halda spilakvöld. Við stóðum fyrir nokkrum slíkum á  Café Loka á Skólavörðustíg. Þar vorum við í lokuðum sal, þar sem fólk  spilaði og spjallaði. Það var raunar svo gaman að þátttakendur voru ekkert á því að fara heim þegar staðnum var lokað, þeir vildu sitja áfram og spjalla,“ segir Björn Ingi.

Hann fékk nokkuð mörg skemmtileg skilaboð frá þeim sem tóku þátt í spilakvöldunum. „Frábært – eiginlega bara yndislegt að eiga góða stund með makaleitarfólkinu. Enginn að pæla í neinu eða neinum, bara spjallað, spilað og snarlað.  Ég meira að segja  lærði nýtt spil,“ voru skilaboðin frá 67 ára gamalli konu. „Mætti á spilakvöld hjá Makaleit.is á Café Loki og er skemmst frá því að segja að það fór fram úr björtustu vonum, mjög góð leið til að kynnast fólki og áður en ég vissi af var tíminn floginn í burt. Takk fyrir mig,“ sagði 54 ára karl.

Það átti að halda páskaeggjanámskeið nú í aðdraganda páska. Þátttaka í því var ekki nógu og góð það varð því að aflýsa námskeiðunum. „Það voru nógu magar konur sem vildu taka þátt en karlarnir voru eitthvað

Sigríður Björk matreiðslumeistari.

feimnir við þetta. Við förum ekki af stað með námskeið nema það séu jafnmargir karlar og konur sem skrá sig til leiks,“ segir Björn Ingi og bætir við að þetta hafi verið mikil vonbrigði fyrir konurnar sem voru búnar að skrá sig.

Nú er hins vegar komið að því að halda matreiðslunámskeið í samvinnu við Salt Eldhús. Í námskeiðslýsingu segir að á námskeiðinu læri þátttakendur að gera tortillu-kökur frá grunni úr maísmjöli. Úr þeim gerum við „taco´s“ með þrem mismunandi fyllingum: fisk, hægeldaðri grísasíðu og grænmetisfyllingu. Þið lærið líka að gera gómsætt lárperumauk, chimichurri-sósu og tómatsalsa. Límónan er ekki langt undan til að koma öllum í sanna Mexíkóska stemmingu. Eftir að búið er að útbúa „taco´s“ er smakkað á öllum tegundum sem eru búnar til. Innifalið er allt hráefni, fyrsta flokks aðstaða og afnot af svuntu og áhöldum sem til þarf. Þátttakendur fá uppskriftirnar með sér til eignar. Kennari á námskeiðinu er Sigríður Björk Bragadóttir matreiðslumaður og eigandi Salt Eldhúss.

Þeir sem hafa áhuga á námskeiðinu þurfa að skrá sig á Makaleit.is og það kostar ekkert. Námskeiðið kostar 11.499 krónur. Hámarkfjöldi þátttakenda er 16, átta karlar og jafnmargar konur.

Námskeið í boði:

  • 45-60 ára föstudaginn 29. mars 17:00–19:00
  • 35-45 ára föstudaginn 5. apríl 17:00–19:00
  • 40-55 ára mánudaginn 15. apríl 17:00–19:00
  • 60-75 ára mánudaginn 22. apríl 17:00–19:00

Þeir sem vilja fræðast nánar um vefinn og þar sem þar er í boði geta farið inn á Makaleit.is. Auk þess má geta þess að í þættinum Ísland í dag fimmtudaginn 28. mars ætlar Vala Matt að fjalla nánar um vefinn og ræða við fólk sem kynntist í gegnum hann.

Ritstjórn mars 27, 2019 07:39