Suðurríkjaherforingi frá Big Sur eftir Richard Brautigan er eins og aðrar bækur höfundar óhefðbundin í byggingu og frásagnarstíl. Enginn heilstæður söguþráður leiðir lesandann áfram og sagan byggist upp af lýsingu á atvikum og myndum sem dregnar eru upp og eru oft bæði heillandi og raunsannar. Flest í bókum Richards er háð túlkun lesandans og hann raðar saman viðburðunum og skapar söguna.
Gróflega má skipta bókinni í tvennt. Í fyrri hlutanum kynnast þeir Jesse og Lee Mellon þegar þeir flytja í sama hús. Sá síðarnefndi telur að afi hans hafi verið herforingi í her Suðurríkjamanna í þrælastríðinu. Fyrir þessu er þó ekki hægt að finna neinar sannanir. Lee kynnist sextán ára stúlku og gerir hana ófríska. Stúlkan er sótt af föður sínum en kemur aftur í leit að Lee en hann er þá fluttur til Big Sur. Í síðari hluta bókarinnar skiptast þeir Jesse og Lee á bréfum og Jesse flytur til hans í Big Sur. Þeir búa þar saman í hálfgerðri eymd og einangrun sem er trufluð af kór froska sem er við það að gera þá félaga brjálaða. Nokkrir gestir líta við ungir strákar að reyna að stela bensíni af bílnum þeirra, Roy Earle vinur Lees og Elaine. Hún og Jesse verða par og hún flytur inn á þá. Þau verða sér út um krókódíla til að reyn að losna við froskana en að öðru leyti er líf þeirra tilbreytingalítið og líkt og venjulega býður Richard lesendum sínum að velja endinn og margvísleg sögulok eru möguleg.
Suðurríkjaherforingi frá Big Sur var fyrsta skáldsaga Richards Brautigans til að vera gefin út en hann skrifaði Silungsveiðar í Bandaríkjunum áður en hún hlaut ekki náð fyrir augum útgefenda fyrr en síðar. Richard Brautigan fæddist 30. janúar árið 1935 á í Oregon-fylki í Bandaríkjunum. Faðir hans, Bernard Frederick, var verkamaður í verksmiðju en móðir hans, Lulu Mary, gengilbeina . Hjónin slitu samvistum áður en Richard sonur þeirra fæddist. Lulu Mary vissi ekki einu sinni að hún væri ófrísk þegar hún fór. Richard hafði ævinlega lítið af föður sínum að segja en Lulu Mary var ekki sérlega góð móðir. Eitt sinn skildi hún Richard einan eftir með fjögurra ára gamalli hálfsystur sinni á hótelherbergi í tvo daga. Hann var aðeins níu ára og ábyrgðin lagðist mjög þungt á hann.
Lulu Mary átti eftir að giftast tvisvar enn og eignast tvö börn í viðbót. Systkinin urðu því fjögur og áttu hvert sinn föðurinn. Fjölskyldan var ævinlega sárafátæk og síðasti stjúpfaðirinn, William David Folston Sr. var ofbeldismaður og alkóhólisti. Margar af sögum Richards byggja á erfiðri reynslu hans í æsku. Hann flutti til San Fransisco um tvítugt og hóf þar rithöfundarferil sinn þegar hann sendi frá sér sína fyrstu ljóðabók. Hún vakti litla athygli og hið sama má segja um Suðurríkjaherforingjann og fleiri bækur eða þar til Silungsveiði í Ameríku kom út árið 1967. Hún sló í gegn en á sjöunda áratugnum var eins og Richard Brautigan væri flestum gleymdur. Sumir hafa viljað flokka hann með beatnikk-höfundunum, Allan Ginsberg, Jack Kerouac og William S. Burroughs voru þeirra fremstir. Sú flokkun er þó hæpin því Richard hafði óbeit á hippunum og hann var talsvert yngri en þeir Kerouac og Burroughs. En þótt erfitt sé að flokka Richard Brautigan eða fella hann undir einhverja tiltekna bókmenntastefnu er eitthvað heillandi við skrif hans og það hvernig hann fer með texta. Sjálfur glímdi hann við þunglyndi alla tíð og framdi sjálfsvíg árið 1984, þá fjörutíu og níu ára gamall.
Steingerður Steinarsdóttir ritstjóri Lifðu núna skrifar.
