Þjóðhátíðardagur Íslendinga 17. júní var hátíðisdagur á flestum heimilum. Flestir sem ólust upp á sjötta og sjöunda áratug síðustu aldar muna eftir að hafa verið klædd í spariföt, drengirnir vatnsgreiddir og stúlkur iðulega með hatta. Ég man eftir köflóttum drögtum sem við systur áttum og við þær voru bornir hvítir hattar með gulum blómum. Um hálsinn voru við með festar úr gulum perlum og sjaldan hef ég verið jafnánægð með útlitið og þann dag. Því miður tókst mér að detta niðri í bæ, hrufla hnéð og slíta perlufestina. Það var hræðileg sorg. Annar þjóðhátíðadagur varð minnistæður fyrir það að ég týndist og einhver góð kona fór með mig að sviðinu í Lækjargötu og mamma var kölluð upp. Mikið varð ég fegin þegar ég sá hana koma. En eitt var föst venja allan minn uppvöxt, eftir að hafa farið í skrúðgöngu og horft á skemmtiatriðin í bænum var farið heim og þar biðu tertur og heitt súkkulaði. Hér er uppskrift að nokkrum þjóðhátíðartertum.
Rice Crispies terta með karamellubráð
Botn:
100 g suðusúkkulaði
100 g karamellufyllt súkkulaði
100 g smjörlíki
4 msk. síróp
4 bollar Rice Crispies
Súkkulaðið, smjörlíkið og sírópið er brætt saman í potti, rice crispiesinu hrært saman við blönduna í pottinum og hann tekinn af um leið. Sett í form og kælt í ísskáp.
Ofan á botninn
1 banani, stappaður
11/2 dl þeyttur rjómi
Hrært saman og smurt jafnt yfir botninn.
Karamellubráð
25–30 Nóatöggur, ljósar
1 dl rjómi
Brætt saman í potti við vægan hita, síðan kælt og látið leka yfir rjóma- og bananablönduna ofan á kökunni.
Eplakaka
200 g hveiti
200 g sykur
200 g smjör
2–3 epli
Hráefnin eru hnoðuð saman í skál, síðan er hluti deigsins tekinn og því þrýst í botninn á pæformi. Eplasneiðum er raðað ofan á og afgangnum af deiginu dreift þar yfir. Hægt er að bragðbæta með kanil eða múskati ef smekkur manna leyfir það. Eplakakan er bökuð við 180° C í u.þ.b. 45 mín. Kakan er borin fram heit með rjóma eða ís.
Súkkulaðidraumur
Einfaldur botn en gefa skal sér góðan tíma í að búa til kremið
Botn:
125 g smjör
360 g púðursykur
2 stk. egg
150 g suðusúkkulaði
350 g hveiti
2 tsk. lyftiduft
3 tsk. matarsóti
60 g kakó
2 1/4 dl mjólk
1 tsk. vanilludropar
Aðferð: Hrærið vel saman sykur og smjör, setjið eggin saman við eitt í einu, bræðið súkkulaðið og blandið því saman við. Setjið mjólkina í og síðan þurrefnin saman við allt og hrærið vel. Smyrjið tvö 26 sm form og bakið við 180° C í u.þ.b. 25–28 mín.
Krem
60 g kakó
500 g flórsykur
2 msk. síróp
75 g smjör
3/4 dl vatn
1/2 tsk. vanilludropar
2 msk. kaffi. (má sleppa)
Aðferð: Blandið saman kakói, flórsykri, sírópi og smjöri, setjið í pott og hitið við vægan hita. Hrærið stöðugt í á meðan. Blandið svo vatni og kaffi saman við ásamt vanilludropum. Setjið í skál og þeytið vel í u.þ.b. 10 mín. Smyrjið að lokum kreminu á botnana.
Frönsk súkkulaðikaka
175 g smjör
175 g suðusúkkulaði
180 g sykur (2dl)
3 eggjarauður
1/2–1dl heslihnetukjarnar
60 g hveiti
1 tsk. kaffiduft
3 eggjahvítur
Aðferð: Bræðið smjörið og takið pottinn af. Brjótið súkkulaðið í bita og bræðið það í heitu smjörinu. Bætið sykri og eggjarauðum í og hrærið rösklega. Sigtið hveitið og blandið það fínsöxuðum hnetukjörnunum og kaffidufti. Látið mjölblönduna í súkkulaðihræruna og blandið þessu vel saman. Stífþeytið eggjahvíturnar og hrærið þeim varlega saman við deigið. Smyrjið smelluform vel og stráið í það hveiti eða brauðmylsnu. Látið deigið í formið og bakið í neðstu rim í ofninum við 175–200° C í u.þ.b. 30 mín. Kælið kökuna í forminu áður en hún er tekin úr því og kæld á rist.
Ofan á kökunni
2–3 dl þeyttur rjómi
Jarðarber
Bingó-kúlur bræddar í potti með svolitlum rjóma, kælt svolítið og látið leka yfir kökuna.
