Að vera góð amma og góður afi

Góðar ömmur og afar eru gulli betri, það vita allir. En hvernig verða góðar ömmur og afar enn betri og hvað geta þau gert til að taka þátt í lífi barnabarnanna, hér eru nokkur ráð.

1. Horfið á kvikmyndir með barnabörnunum í spjaldtölvu en skemmtið þeim líka með sögum frá því í gamla daga þegar fólk fór út á vídeóleigu til að ná sér í spólu.

2. Spilið Hljóma og Ragga Bjarna fyrir þau en dansið með þeim við tónlist Of Monsters and Men.

3. Lofið söguhetjur eins og stúlkuna í kvikmyndinni Hungurleikar og leggið áherslu á að stelpur og strákar eru jafnvíg að öllu leyti.

4. Verið vel að ykkur um nútíma barna- og unglingabókmenntir en kennið krökkunum einnig að meta Stefán Jónsson og íslenskar þjóðsögur.

5. Það er allt í lagi að krakkarnir fái pizzu, jafnvel seint að kvöldi, en venjið  þau samt við hefðbundinn mat kennið þeim með tímanum að matreiða vinsælustu rétti fjölskyldunnar.

6. Fáið fréttir af barnabörnunum í gegnum Skype frekar en horfa á fréttir í sjónvarpinu.

7. Standið á hliðarlínunni á fótboltavellinum og hvetjið barnabörnin en bjóðið þeim jafnframt í leikhús og á tónleika til að víkka sjóndeildarhring þeirra.

8. Sendið barnabörnum ykkar kveðju með sms en sendið þeim líka póst upp á gamla mátann svo þau njóti þess að hlakka til einhvers.

9. Þið eruð ávallt til reiðu þegar þörf er fyrir trúnaðarvin eða bara pössun.

Ritstjórn desember 6, 2022 12:45