Allt í einu er eins og þær séu alls staðar, kóreskar snyrtivörur eru auglýstar á facebook, heilu hilluraðirnar í snyrtivöruverslunum eru þaktar í þeim og konur tala um þær sín á milli. Sagt er að húðvörurnar séu mildar, áhrifaríkar og þægilegar. Íris Björk Reynisdóttir er förðunarfræðingur, tískuljósmyndari og eigandi snyrtivöruverslunarinnar Beautybox. Okkur lék forvitni á að vita hvort hún hafi orðið vör við þessa nýju tískusveiflu.
Kóresku hillurnar í Beautybox.
Í Suður-Kórea eru snyrtivörur ört vaxandi útflutningsiðnaður og eigendur fyrirtækja þar leggja mikla áherslu á markaðssetningu á netinu og mest í gegnum samfélagsmiðla. Facebook logar í auglýsingum þar sem kóreskar konur eru sagðar mun unglegri í útliti en þær vestrænu og sagt frá möskum og farða sem eins og fyrir galdra slétta hrukkur, gefa raka og yngja. Eru þessar kóresku snyrtivörur einhvers konar bylting eða eru þetta bara góðar vörur rétt eins og margar aðrar?
„Við þessari spurningu eru mörg svör,“ segir Íris. „Kóreumenn eru mjög framarlega hvað varðar tækni og innihaldsefni. Þeir búa yfir þekkingu á mörgum efnum. En það má líka benda á að vörur frá mörgum evrópskum merkjum eru framleiddar í Suður-Kóreu. Þótt þú sért með vöru frá frönsku merki er ekki endilega víst að hún hafi verið búin til þar í landi.
Löggjöfin Suður-Kóreu er hins vegar öðruvísi en í Evrópu og Bandaríkjunum og þeir mega setja á pakkningar fullyrðingar og segja mun meira en leyft hér og í USA. Kórea er með lagalegan milliflokk sem hvorki ESB né Bandaríkin hafa. Undir kóresku snyrtivörulögunum er flokkur sem heitir functional cosmetics — vörur sem mega fullyrða um tiltekna virkni. Þeir mega segja að sannað sé að þetta krem fjarlægi hrukkur, ellibletti og allt hvað er en það geta vestrænu merkin ekki. Kóreumenn geta staðhæft ýmislegt um fleiri innihaldsefni án þess að fara með vöruna í klínískar prófanir en leyft er hér. Velgengni þeirra liggur þess vegna að hluta til í markaðssetningunni. Ef þú notar samþykkt efni í samþykktum styrk sleppurðu við að leggja fram eigin klínísk gögn.
Aftur á móti verður líka að hafa í huga að þeir eru mjög framarlega í allri tækni og eru að gera mjög góða hluti. Þeir framleiða líka í miklu magni og geta því selt vöruna ódýrt. Hér á landi sjá heildsölur almennt um dreifingu á vörunum og starfsfólk þeirra sér um að gæta þess að vörurnar uppfylli alla staðla, að þær séu fluttar á öruggan hátt og passað upp á vörurnar séu eins og þær eiga að vera. Í minni verslun þurfum við að uppfylla alls konar kröfur til að mega selja vörumerkin sem hér eru í boði.“
Allir geta pantað og selt
Íris bjó í London þar sem hún stundaði nám við hinn virta London College of Fashion í tískuljósmyndun og stíliseringu þegar hún stofnaði Beautybox. Áður hafði hún lokið förðunarnámi í Airbrush and Makeup School. Óhjákvæmilega hefur svo safnast í sarpinn umtalsverð þekking á húðumhirðu og innihaldsefnum í snyrtivörum. Það er eitthvað sem allir sem selja snyrtivörur verða að þekkja. En er hægt að tala um grá svæði eða gráan markað þegar Kóreumenn eru annars vegar?
„Kóreski markaðurinn skákar svolítið í skjóli þess hve langt þeir eru í burtu,“ segir hún. „Þeir eru t.d. með evrópska höfn eða vöruhús í Evrópu og kannski ekki endilega viðurkennda dreifingaraðila. Öll kóresku merkin sem fást hjá okkur eru frá viðurkenndum dreifingaraðilum hér á landi en hægt er að fá mörg önnur hér og jafnvel sum þau sömu og við bjóðum sem hafa ekki endilega farið í gegnum viðurkennda dreifingaraðila heldur getur hver sem er pantað vörur og selt þær.
Það eru svolítið öðruvísi staðlar og standardar með kóresku merkin en önnur, til að mynda gæti kóreskt merki farið í sölu á stað þar sem önnur merki væru aldrei í boði. Við þurfum uppfylla margvíslegar kröfur um framsetningu varanna, geymslu, orðalag og fleira sem við notum við að þjónusta viðskiptavini. Landamæri eru auðvitað öll svolítið að mást út og í dag geta menn pantað vörur beint frá kóreskum stórverslunum sé því að skipta. Kóresku merkin eru að hrannast inn hér á Íslandi núna. Svo segja Kóreumenn líka að þau merki sem eru vinsæl í Evrópu eru ekkert endilega vinsæl í Kóreu því þau eru framleidd fyrir evrópskan markað. Þetta er skemmtilegt og það er margt í þessu sem maður hefði ekkert endilega hugsað út í. En þeir eru færir.“
Mildar með mikla vörn
Kóreskar snyrtivörur innihalda mörg nýstárleg efni meðal annars má nefna sniglaslím, erfðaefni laxa, olíu úr hrossafitu og býflugnaeitur. Þetta hljómar ekki sérlega aðlaðandi en kóreskir framleiðendur fullyrða að þetta sé áhrifaríkt. Þrátt fyrir þessi innihaldsefni eru snyrtivörur þeirra mildar, veita mikla vörn gegn UV-geislum sólar og gefa mikinn raka. Í þeim eru líka lækningajurtir á borð við hofnafla eða Centella asiatica sú planta er oft kölluð Tiger Grass því særð tígrisdýr velta sér upp úr henni til að græða sár sín, níasínamíð og seyði úr sýrðum jurtum. Þetta er mjög heilandi og kóreskir snyrtivöruframleiðendur segjast fremur vilja framleiða góðar vörur með langtímavirkni en sterkari húðvörur. Hvað með farðann sem lagar sig að húðlitnum og nærir húðina um leið, er hann einhver töfralausn?
„Þetta er búið að vera lengi. Eitt vinsælasta BB-kremið í búðinni er hvítt og það aðlagar sig að húðinni. Kannski henta slík krem ekki endilega öllum. Við sjáum oftast manneskjur með svipaða húðtegund nota þetta. Dökkar stelpur setja þetta til að mynda ekki á sig. Í þessum kremum eru ákveðin litapigment sem springa og við bjóðum svona farða frá bæði kóreskum og evrópskum merkjum.“
Þannig að hrukkurnar hverfa ekkert eins og sumar konur hafa kannski verið að gera sér vonir um.
„Nei,“ segir Íris og brosir. „Aftur á móti þurfum við að huga að ákveðnum innihaldsefnum, nota sólarvörn, retinól, ávaxtasýrur með réttum vörum og réttri aðferð. Þessi efni færðu í kóresku vörunum en einnig í mörgum öðrum. Þótt kóreskar vörur séu góðar eru þær ekkert endilega bylting. Þær eru hins vegar svolítið að „trenda“. Frakkland er enn helmingi stærri útflutningsaðili snyrtivara en Kórea þótt þeirra hlutur hafi vaxið gífurlega á undanförnum árum. Þeir hafa líka verið svo áberandi. Við fórum til dæmis nýlega á Cosmoprof, stóra árlega snyrtivöruráðstefnu í Bologna á Ítalíu og sáum að kóresku merkin voru alls staðar. Það er útrás í gangi sem gaman er að fylgjast með. Nú erum við búin að reka Beautybox í tíu ár og við höfum séð að fólk elskar nýjungar. Það elskar að prófa en samt halda alltaf þessi rótgrónu merki sínum hlut. Það er vegna þess að fólk prófar en fer svo aftur að nota það sem það hefur verið að nota áður. Þau standa fyrir sínu og hafa alltaf gert það.“
Með sheet maska að borða súpu
Eitt af því sem er áberandi með kóresku merkin er áferðin á húðvörunum. Þeir bjóða létt krem, rakagefandi andlitsvötn og grímumaska og sólarvörn í stífu formi ekki ólíku svitakremi.
„Það hefur alltaf verið rótgróið í menningunni að hugsa vel um húðina og við höfum allar heyrt talað um tíu skrefa húðrútínu. Ég lærði úti í London og eignaðist tvær góðar vinkonur frá Suður-Kóreu meðan ég var í námi. Eitt sinn gisti ég hjá annarri þeirra eftir að við höfðum farið út á lífið. Það var svo langt heim til mín að það var hentugra. Hún sagði mér að þrífa á mér andlitið. Klukkan er þrjú um nótt og hún rétti mér sheet maska og sagði: „Settu þetta á þig. Þetta er gott fyrir þig.“ Við fórum svo fram í eldhús og í stað þess að steikja hamborgara handa okkur áður en við fórum að sofa bjó hún til súpu. Ég sat með sheet maska á andlitinu að borða súpu um miðja nótt sem er auðvitað besti matur sem hægt er að nærast á eftir að hafa verið á djamminu, nógur vökvi og næring. Það eru fimmtán ár síðan þetta var.
Í Kóreu hafa lýtalækningar verið algengar lengi. Það er algengt að stúlkur útskrifist úr menntaskóla og fái í útskriftargjöf augnaðgerð eða aðgerð til að hækka nefið. Kóreumönnum vantar suma nefbrú og eru svolítið flatir efst á nefinu og láta gjarnan laga það,“ segir hún.
Snyrtivöruiðnaðurinn er sannarlega áhugaverður bransi og þótt hann geri vissulega út á hégómleika mannsins og löngun til að líta vel út skapar hann líka vellíðan. Það jafnast fátt á við það að taka sér tíma til að dekra við sjálfan sig og þar koma góðar húðvörur ekki síst við sögu. En hvort fólk kýs þá kóresk krem eða evrópsk er smekksatriði en hvoru tveggja getur skapað ánægjulega stund.
Steingerður Steinarsdóttir ritstjóri Lifðu núna skrifar.
