Líklega dettur engum fyrst í hug að fá sér ís ef þeir eru að hugsa um hollustu og gott mataræði en það er margt verra. Eftir því sem við eldumst því mikilvægara verður að gæta vel að því hvað við borðum og passa að hreyfa okkur. Margir sjá þá fyrir sér þurrt salat, gulrætur og fræ en hollustu er að finna í fleiru en káli og mögrum fiski.
Íslenska máltækið allt er gott í hófi á hér vel við. Það gefast einnig allir upp á að vera alltaf með kaloríuteljarann við höndina og velta stöðugt fyrir sér hvort óhætt sé að leyfa sér eitthvað eða ekki. Það þarf ekki að vera fullkominn á þessu sviði fremur en öðrum. Galdurinn er að leyfa sér eitthvað af og til en ekki á hverjum degi. Ís er sannarlega ekki nein einstök hollustuvara en hann hefur marga kosti. Hann er sætur og gleður okkur þess vegna, í honum er mjólkuprótín og hann er saðsamur. Þess vegna er hann betri en margt annað ef menn ætla að leyfa sér eitthvað á annað borð. Svo eru til hollari útgáfur af ís, þar á meðal sorbet, frosin jógúrt og vegan ís.
Nýlega rannsókn hefur einnig sýnt að neysla mjólkurvara dregur úr líkum á að fólk þrói með sér sykursýki týpu 2. Þar á meðal eru jógúrt, ís, skyr og annað góðgæti úr mjólk. Það þýðir auðvitað ekki að fólk eigi að fá sér ís í morgunmat og skella í sig hálfum lítra um miðjan dag. En það er vert að skoða þetta í ljósi þess hvernig og hvað við borðum. Ís með alls konar sælgæti saman við er auðvitað ekki hollur en hreinn vanilluís er fínn.
Hollustan getur gengið út í öfgar
Vandinn við alla öfga er að fyrr eða síðar sveiflast pendúllinn og þá iðulega lengst í hina áttina. Þannig er þekkt að ef fólk leggur of hart að sér eða agar sjálft sig svo strengilega að öll ánægja hverfur úr lífinu er líklegt að það gefist upp og springi á limminu með látum. Besta lífsviðhorfið felst að leitast við að lifa heilsusamlega og lifa vel. Sjálfsafneitun og skortur skapar aldrei vellíðan.
Öll umræða um hollustu og mataræði virðist ganga út á boð og bönn. Ekki borða þetta, ekki borða milli mála, ekki leyfa þér nammidaga, borðaðu fimm skammta af grænmeti og ávöxtum á dag og svo framvegis. Enginn hefur í raun þann stálvilja eða sjálfsaga að halda út meinlætalíferni til lengdar. Það skapar heldur ekki vellíðan og því meira sem við leitumst við að neyða okkur sjálf til að uppfylla einhverjar ómögulegar kröfur því verr líður okkur. Í stað þess að lifa lífinu og gera það sem okkur þykir ánægjulegt erum við í stöðugri sjálfsafneitun.
Eitt af því sem vísindin hafa sýnt okkur að helst skapi vellíðan og góða heilsu á efri árum eru góð félagsleg tengsl. Matur leikur stórt hlutverk í að tengjast og viðhalda böndum milli fólks. Fyrsta skrefið í átt að bættri heilsu gæti því verið að bjóða góðum vinum í mat, elda góðan og hollan mat, nóg er til að slíkum uppskriftum og bjóða upp á vanilluís í eftirrétt. Nú og svo má dansa svolítið á eftir.
Steingerður Steinarsdóttir ritstjóri Lifðu núna skrifar.
