Hernámsæskan eftir Leif Reynisson er áhugaverð og upplýsandi bók um áhrif hernámsins á íslensk börn og unglinga. Eiginlega má segja að á þessum árum hafi íslensk æska orðið til. Fram að því var litið á börn nánast eins og litla fullorðna og mörg voru látin bera mikla ábyrgð snemma. Hernáminu fylgdu erlend áhrif, ný viðhorf og batnandi efnahagur. Allt stuðlaði þetta að því börn fengu frekar að vera börn og fá frelsi til leiks án ábyrgðar lengur.
Stríðsárin voru mótandi örlagatímar í lífi allra þjóðanna er tóku þátt í henni. Menningaráhrif fluttust milli landa, hugmyndafræðilegt uppgjör var óhjákvæmilegt og sú sorg er fylgdi mannfalli og skaða styrjaldarinnar snerti kynslóðirnar djúpt. Oft hefur verið sagt að Ísland hafi sloppið vel frá stríðinu en það er dálítil einföldun. Saga hernámsáranna sýnir að margt sem börn og ungt fólk upplifði á þessum árum hafði varanleg áhrif á líf þess.
Leifur Reynisson
Herinn færði Íslandi atvinnu, djasstónlist, Coca-Cola, dansmenningu, nýja tísku og breytta framkomu. Unglingar tóku að móta eigin klæðaburð, kjósa annað mataræði en hinir eldri, hanga í sjoppunni og keyra eða ganga rúntinn. Allt fékk annan brag og fleiri möguleikar opnuðust. Margir fengu líka útsýni til annarra landa og þá sýn að möguleikar á námi og uppbyggingu atvinnumöguleika væru fáanlegir eftir öðrum leiðum en Danmörk bauð upp á.
Unglingar fóru að skapa sér eigin ímynd og sjálfsmynd óháð hinum fullorðnu og það var ekki alltaf vinsælt. Unglingamenning og unglingatíska varð til. Hernámsæskan er skemmtilega skrifuð bók, ríkulega myndskreytt og skemmtilega unnin. Þess má geta að í spilara RUV eru hlaðvarpsþættir höfundar um sama efni aðgengilegir.
https://www.ruv.is/utvarp/spila/hernamsaeskan/35431/ahslrl
Steingerður Steinarsdóttir ritstjóri Lifðu núna skrifar.
