Teygjur eru vanmetin æfingatæki en þær henta vel til að auka álag á vöðvana þegar unnið er að því að byggja upp styrk. Þær eru líka fyrirferðarlitlar, auðvelt að grípa til þeirra og gefa þér kost á að æfa meira heima.
Æfingateygjur fást í flestum íþróttavöruverslunum og eru fínar til taka stutta styrktaræfingu á hverjum degi. Með aðstoð þeirra má þjálfa allan líkamann á 15 mínútum.
Hvaða teygjur er best að nota?
Til eru nokkrar gerðir, sumar eru samtengdar og úr þykku gúmmíi meðan aðrar eru með handföngum á báðum endum. Almennt gildir að heilar teygjur veita meira viðnám og þær eru til mismunandi teygjanlegar. Áður en byrjað er á að þjálfa líkamann ætti alltaf að hita svolítið upp. Gott er að byrja á að ganga á staðnum í svolitla stund, teygja handleggina upp fyrir höfuðið, taka nokkur spretthopp, mjaðmasveiflur eða aðrar upphitunaræfingar sem þú kannt. Það má gjarnan setja músík á fóninn það hvetur mann alltaf áfram.
Hnébeygjur
10 endurtekningar. 2 umferðir. 30 sekúndna hvíld.
Stígðu á æfingateygjuna með um mjaðmabreidd á milli fóta. Haltu í endana á teygjunni og hafðu hendurnar við axlirnar. Beygðu þig niður þar til um 90 gráðu horn er í hnjánum og réttu síðan úr þér með því að þrýsta þér aftur upp í upphafsstöðu með beinum hnjám og mjöðmum.
Flugæfing
10 endurtekningar. 2 umferðir. 30 sekúndna hvíld.
Festu teygjuna í axlarhæð fyrir aftan þig í standandi stöðu. Hægt er að festa teygjuna við súlu, stöng, stiga o.s.frv. Haltu í endana með annarri hendi hvorum megin. Það á að vera smá viðnám í teygjunni þegar þú stendur með útrétta handleggi eins og „snjóengill“. Færðu síðan lófana saman, en haltu höndunum í brjósthæð allan tímann. Framkvæmdu æfinguna með örlítilli beygju í olnbogum og réttu síðan aftur út í upphafsstöðu.
Sitjandi róður
10 endurtekningar. 2 umferðir. 30 sekúndna hvíld.
Sestu með beina fætur. Festu miðju teygjunnar undir iljunum og haltu í handföngin. Slakaðu á öxlunum og dragðu handföngin að maganum. Slepptu síðan rólega aftur í upphafsstöðu.
Mjaðmabrú (Glute Bridge)
10 endurtekningar. 2 umferðir. 30 sekúndna hvíld.
Komdu hringteygju fyrir utan um lærin, rétt ofan við hnén. Ef þú ert með teygju með handföngum getur þú bundið hana saman og stigið inn í hana. Leggstu á bakið með bogin hné og iljar á gólfinu. Hafðu hæfilegt bil á milli fóta þannig að spenna sé á teygjunni og þú þurfir að vinna gegn henni með því að þrýsta lærunum út á við. Kreistu rassvöðvana saman og lyftu mjöðmunum, mjaðmagrindinni og neðri hluta baksins frá gólfinu. Haltu lokastöðunni augnablik og farðu síðan aftur í upphafsstöðu áður en þú endurtekur.
Svo er bara að byrja að hreyfa sig og njóta en vert er að hafa í huga að öll líkamsrækt verður skemmtilegri í góðum félagsskap svo það gæti borgað sig að draga makann eða góðan vin með sér í æfingarnar.
