Omar Sharif og eiginkonan Faten Hamama
Egypski leikarinn Omar Sharif lést nýlega í Kaíro í Egyptalandi 83 ára að aldri. Omar Sharif var listamannsnafn hans. Hann hét í raun og veru Michael Demitri Chalhoub og fæddist í Egyptalandi árið 1932. Faðir hans var timburkaupmaður. Hann lauk námi í stærðfræði og eðlisfræði frá Háskólanum í Kaíró, áður en hann söðlaði um og gerðist kvikmyndaleikari. Hann hóf kvikmyndaferilinn í heimalandi sínu á sjötta áratugnum og kvæntist fljótlega leikkonunni Faten Hamama. Til þess að kvænast henni snerist hann til múhameðstrúar.
Talaði sex tungumál
Omar Sharif varð þekktastur fyrir leik sinn í breskum og bandarískum myndum og hlaut Golden globe verðlaunin fyrir leik sinn, annars vegar í myndinni Arabíu Lawrence og hins vegar í myndinni Dr. Zhivago. Dr. Zhivago var þriggja klukkustunda löng mynd um ástir og örlög, sem gerist í Rússlandi byltingarinnar. Hún var gerð árið 1965. Omar Sharif talaði sex tungumál og lék oft menn af erlendum uppruna. Hann átti mikilli velgengni að fagna í kvikmyndunum, vann til margra verðlauna og lék í sinni síðustu mynd árið 2006, rúmlega sjötugur.
Bjó á evrópskum hótelum
Omar Sharif árið 2003
Þau Omar og Faten eignuðust einn son, en skildu árið 1974. Omar kvæntist aldrei aftur. Hann bjó á hótelum í Evrópu og stundaði áhugamál eins og kappreiðar og bridge af kappi. Um tíma átti hann í sambandi við Barböru Streisand, sem olli nokkru fjaðrafoki í pólitíkinni í Egyptalandi, þar sem hún studdi Ísrael í átökum við Egypta.
Omar átti við hjartveiki að stríða síðustu árin og á endanum gaf hjartað sig. Hann lést í Kaíró 10.júlí síðast liðinn og var jarðsettur þar.
