Beinþynning er alvarleg og vaxandi ógn við heilsu milljóna karlmanna um allan heim. Því miður er sjúkdómurinn oft ekki greindur nægilega snemma og því ekki meðhöndlaður sem skyldi. Það gerir að verkum að menn sem fá beinþynningu geta dáið eða orðið örkumla. Því er oft haldið fram að þetta sé kvennasjúkdómur, en það er ekki rétt. Einn af hverjum fimm karlmönnum í heiminum beinbrotnar vegna þess að hann er með beinþynningu. Staðreyndin er sú, að um þriðjungur allra mjaðmabrota í heiminum verður meðal karla og það eru tvisvar sinnum meiri líkur á að þeir deyji af þeim en konur.
Eðlileg bein
Bein í manni með beinþynningu
Þarf lítið til að bein brotni
Karlmenn sem líta út fyrir að vera sterkir, geta haft léleg bein án þess að gera sér grein fyrir því. Beinþynning er sjúkdómur sem sem veikir beinin þannig að þau springa eða brotna. Það er mjög sársaukafullt. Það þarf ekki mikið til að beinin brotni ef menn eru komnir með beinþynningu. Kannski bara að fólk detti úr lítilli hæð, hrasi, hnerri eða beygi sig niður til að hnýta skóreimarnar. Hryggbrot og mjaðmabrot eru alvarlegustu brotin.
Meiri hætta á beinþynningu en krabbameini í blöðruhálskirtli
Það kemur fram hjá Alþjóða beinverndarsjóðnum að það séu meiri líkur á að karlar fái beinþynningu einhvern tíma á ævinni, en krabbamein í blöðruhálskirtil. Helstu áhættuþættir eru: Aldurinn, saga um beinþynningu í fjölskyldunni, beinbrot eftir fimmtugt, Langvarandi notkun „glucocorticosteroids“ lyfja sem eru notuð meðal annars við astma og gigt og lítill styrkur testósterón hormóns í blóðinu. Einnig geta ýmsir sjúkdómar aukið líkur á beinþynningu, svo sem gigt og sykursýki. Þeir sem þessir áhættuþættir eiga við um, ættu að fara til læknis séu þeir orðnir sjötugir og láta skoða hvort þeir séu með beinþynningu.
Skiptir máli að huga snemma að beinheilsu
En lífssstíll karlmanna skiptir líka máli í þessu sambandi. Það að reykja, neyta áfengis meira en góðu hófi gegnir og borða óhollan mat er meðal þess sem eykur líkur á beinþynningu. Vítamínsskortur eykur líkurnar einnig og það er mjög slæmt að hreyfa sig ekki reglulega. Styrkur beina ræðst mikið af því hvernig menn hafa farið með sig um ævina. Það þarf að huga að beinheilsunni snemma á ævinni, vilji menn komast hjá beinþynningu. En nægt calcium, D-vítamín og prótein eru grundvallaratriði til að halda beinunum heilbrigðum.
