Blekkingaleikur fjármálaráðherra

Landssamband eldri borgara segir að tekjubilið milli eldri borgara og annarra hópa í samfélaginu hafi aukist jafnt og þétt.  Í  dag séu 30 prósent eldri borgara með tekjur undir fátækramörkum og um 80 prósent með tekjur undir framfærslumörkum.  Í nýrri ályktun frá Landssambandi eldri borgara segir:

Yfirlýsingar Bjarna Benediktssonar fjármálaráðherra að undanförnu um að eldri borgarar hafi fengið mestu kaupmáttaraukningu allra á síðustu árum, hafa vakið mikla athygli og reiði meðal margra eldri borgara. Það má leika sér með tölur og prósentur þannig að niðurstöðurnar henti málflutningi stjórnmálamanna og vissulega hentar það stjórnvöldum að halda því fram að eldri borgarar búi við meiri kaupmáttaraukningu en aðrir. Staðreyndin er hins vegar sú að, þrátt fyrir bætta afkomu fyrri flesta með breytingunni um áramótin 2016 til 2017, eru um 30 prósent eldri borgara með tekjur undir fátækramörkum og um 80 prósent með tekur undir framfærslumörkum.

Þar að auki hefur tekjubilið milli eldri borgara og annarra hópa í samfélaginu aukist jafnt og þétt á undanförnum árum, þar sem tekjur eldra fólks hafa fylgt launaþróun í landinu. Enn á ný eiga laun eldri borgara að hækka minna en launaþróun gefur tilefni til, eða um 3,4 prósent á næsta ári. Stjórn Landssambands eldri borgara skorar á alþingismenn að standa við stóru orðin frá því í síðustu kosningabaráttu og bæta kjör eldri borgara til samræmis við aðra, segir í yfirlýsingu LEB.

Ritstjórn nóvember 20, 2018 14:00