Margir þekkja ítalska eftirréttinn tiramisu. Þessi sem hér er birtur er tilbrigði við þennan fræga eftirrétt og gefur honum ekkert eftir.
400 g rjómaostur, við stofuhita
3/4 bolli flórsykur
7 msk. Marsala vín
1/2 bolli sýrður rjómi
1 ask jarðarber
3/4 bolli sjóðandi vatn
2 msk. sykur
3 tsk. skyndikaffiduft
1 pakki ,,lange vingers“ kexkökur
rift dökkt súkkulaði
Hrærið rjómaost, flórsykur og 5 msk. Marsala vín í hrærivél þar til blandan er orðin kekkjalaus og jöfn. Bætið sýrða rjómanum saman við og hrærið áfram. Skerið helminginn af jarðarberjunum í sneiðar og helminginn í tvennt. Blandið því næst sykrinum og skyndikaffinu út í sjóðandi vatnið og hrærið þar til þurrefnin hafa leyst upp. Bætið afganginum af víninu, eða 2 msk. út í vökvann. Dýfið kexkökunum út í vökvann og raðið þeim í botninn á fati með háum börmum. Dreifið 2/3 af rjómaostsblöndunni yfir kökurnar og því næst jarðarberjasneiðum. Dýfið fleiri kexkökum í kaffiblönduna og raðið yfir jarðarberin. Dreifið afganginum ar rjómaostsblöndunni yfirkökurnar. Stráið rifnu súkkulaði þar yfir og skreytið með afganginum af jarðarberjunum. Geymið í kæli í að minnsta kosti 4 klst. áður en þessi dásamlegi eftirréttur er borinn fram. Tilvalið er að útbúa þennan rétt daginn áður.
